CADS Batch 5-na Member turte lakluh an ni

Central YMA-in ruihhlo do tura a ruat, Central Anti Drugs Squad (CADS) Batch 5-naa Member turte lakluhna hun chu Zirtawpni khan Central YMA Committee Room-ah neih a ni.

CADS Member thar turte lakluh inkhawm hi Central YMA Vice President Lalhmachhuana chuan kaihruaiin Central YMA President R. Lalngheta chuan fuihna thu a sawi a. CADS member tur hian Aizawl khawpui chhunga YMA Branch hrang hrang atangin member ruat thin an ni a, Batch 5-na ah hian member 24 leh a ho khawmtu mi paruk an awm dawn a, Convener atan YMA CEC atangin R.Lalchhandama ruat a ni.

He hunah hian CADS 4th Batch hnathawhte tarlan a ni a, CADS 4th Batch hian Heroin hawng 667 manin an thil man hlut zawng hi tualchhung rate-ah Rs 1,66,75,000 hu a tling a. Hemi hun chhung vek hian ruihhlo zuar leh ngawlvei mi 383 manin an zinga 60 chu Excise kutah an hlan a, mi paruk chu Police kutah hlanin, Forest Department kutah mi pakhat hlan bawkin mi 248 te counselling pek a ni bawk.