MLA nilai Dr. K. Beichhua BJP-ah lut dawn

Mizoram sawrkar-a Minister hlui leh MNF party atanga chawlhtir tak Dr. K. Beichhua chuan BJP a zawm dawn tih sawiin, a zawm hun tur tak erawh hriat ala ni lo thung.

Siaha bial atanga tum hnih MLA atana thlantlin ni tawh Dr. K. Beichhua hian Siaha Press Club-ah thuthar thehdarhtute kawmin Minister atanga paihthlak a nih hnu lawkah MNF Primary Member a nihna hlih sak zui a nih thu sawiin, BJP a zawm tur thu hi a sawi a, “'Ka zawm hun tur tak ka la sawi thei lo. Inthlan puan hunah a ni ang. Inthlan puan hma chu Independent MLA ka ni rih anga, BJP ka support thung ang,” a ti a. Pathian leh mipui zarah BJP ticket-a a tlin ngei a beisei thu sawiin, tling ngei tura theihtawp a chhuah dawn thu a sawi bawk.

Nikum December 13-a Minister atanga a ban chungchang ah Dr. K. Beichhua chuan, nikum-a MADC Session neih laia No Confidence Motion putluh turah Chief Minister pawh an biak thu leh he Motion thlawp tur hian MNF MDC pathum ngen an ni a, a bakah MDC dangte chu hrilhfiah that nise tiin sawrkar paih a nih tak hnu ah erawh MNF MDC 4 te hrilhfiah an tum chu an hrilhfiah thei ta lo niin a sawi a. MNF MDC te hi Aizawl-ah kal nghalin hemi hnu hian  Minister nihna anga banna thehlut tura tih a ni ta a, a hnu rei vak lohah party atanga hnawhchhuah a ni zui ta tih sawiin, “CM thupek zawm a engkim kalpui ka ni a, Vawiin ni thleng hian paihthlak ka nihna chhan ka hre bik lo,” a ti bawk.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man