Aizawl-ah State Geological Programming Board thutkhawm vawi 28-na neih a ni

State Geological Programming Board (SGPB) Meeting vawi 28-na chu nimin khan Aizawl-a GAD Conference Hall-ah neih niin Serchhip Sinking Area Report chu tlangzarh a ni bawk.

Directorate of Geology & Mining leh Commerce & Industries Department bultuma State Geological Programming Board (SGPB) Meeting hi kumtin neih thin niin Chairman chu Secretary, Commerce & Industries Department a nih angin nimin-a thutkhawm hi R. Lalramnghaka IAS chuan a kaihruai a, Geology & Mining bakah Geological Survey of India (GSI) te leh an service mamawhtu Line Department hrang hrangte bakah a kaihhnawih sawrkar Department pawimawh te an tel bawk a ni. He hunah hian kum kalta 2022-2023 chhunga Directorate of Geology & Mining (DGM) leh Geological Survey of India (GSI) [Tripura-Mizoram Circle] hnathawh hrang hrangte tarlan niin, nikum lama SGPB Meeting neih taka Agenda a passed tawh hmalakna leh tun kum kal mek 2023-24 chhunga Work Plan te sawiho niin Agenda lutte sawiho a pawm a ni a. District hrang hranga Deputy Commisioner-te pawh he thutkhawm ah hian an tel a ni.

Sawrkar kum liamta 2022-23 chhung khan Directorate of Geology & Mining chuan sawrkar sum bawmah Minor minerals (lung, balu) atangin Non-Tax Revenue Rs. 10,89,67,804/- an chhunglut a, Petroleum Exploration Licence (PEL) Fee atanga an hmuh Rs. 1,30,55,485/- leh Laboratory Testing Fee Rs. 3,74,200/- chhunglut bawkin a vaiin Rs. 12,23,97,489/- chu Mizoram Sawrkar sum bawmah an chhunglut a ni. Hetihlai hian DGM chhungah Mizoram pum enkawltu thawktu nghet chu 48 an niin sanctioned post chu 86 a ni.

Kum 2022-23 chhung hian Mizoram Sawrkar chuan Directorate of Geology & Mining hnuaiah Chhim lam District Pali (4)-te enkawltu tur Lunglei Zonal Office din phalna pein Post thar 13 a siamsak bawk a. Zonal Office din tur hian Post fill-up tur leh tul dangte buaipui mek a ni bawk. Hei bakah hian Dan thar pahnih (2):Draft - The Mizoram Minor Minerals (Concession & Prevention of Illegal Mining), Rules 2023 leh The District Mineral Foundation Rules of Mizoram, 2023 an siam chu Cabinet Meeting-in kumin January 27 khan khan a lo passed sak tawh a, heng Dan-te hi Mizoram Legislative Assemby a lay-a passed a nih veleh hman theih a ni ang.

State Geological Programming Board (SGPB) thutkhawm vawi 28-na ah hian Directorate of Geology & Mining buatsaih Annual Report 2022-2023 leh report 3 (pathum)- Lifeline seismic hazard assessment of Tuipuiral area, Mizoram; Geotechnical Investigation report for Agriculture Growth Centre leh Serchhip Sinking Area te chu tlangzarh a ni.