Hnamdang pasal-a nei Candidate dodal zel tum

Mizo Zirlai Pawl (MZP) General Hqrs. President Lalnunmawia Pautu chuan kumin kumtawpa State Assembly inthlan lo awm turah hnamdang pasal nei in candidate an awm chuan MZP in a dodal zel ang tih a sawi.

Zirtawpni kalta zan-a MZP in Remna ni lawmna Aizawl Vanapa Hall-a an buatsaih ah MZP President Lalnunmawia chuan Hnamdang pasal nei kan ram rorelna sangah thut tuma bei an awm tih sawiin, “MZP chuan ngun takin a ngaihtuah a, kan pi leh pu, kan sipai huaisen, hnam pasaltha ten zalenna, rorelna kan neih an sual chhuahah hian an thut ve kan rem ti lo,” tiin MZP chuan theihtawpin an theihna apiangah an dodal zel dawn tih a sawi a. An hmalakna avangin sawisel, diriam leh chirhtheh an tawk nasa tih sawiin, pawi an tih loh thu a sawi bawk.

Lalnunmawia Pautu chuan Nationalism lamah nasa takin MZP chuan ke a pen tih sawin, Culture venhimna kawngah te pawh hma an lak thin thu leh changkanna, hausakna te chu rawn lut mah se, ram leh hnam a ral chuan an tawrh nasat zual zawk an hlauh avangin theihtawp chhuah an ni tih a sawi a. Tunhnaiah sawrkar hnathawk pension kum tihsan tumna a awm thu pawh sawiin, “|halai hna zawng tam tak, thiam tak tak an awm laia pension kum tihsan tumna hi MZP chuan a tawp thlengin kan dodal dawn a ni,” a ti bawk.