Mizoram DGP thar leh Governor an inkawm

Mizoram-a Director General of Police (DGP) thar Anil Shukla IPS chuan nimin khan Governor Dr. Hari Babu Kambhampati chu Raj Bhavan-ah hmuin thu pawimawh hrang hrang an sawidun.

Governor Dr. Hari Babu Kambham-pati chuan DGP thar chu Mizoram-ah lo lawmin Mizoram Police tana hmasawnna bung thar siam belh turin duhsakna a hlan a. Mizoram Police ten hna an thawk tha nia a hriat thu sawiin, kawng thenkhatah erawh hmasawnna tur a la awm niin a sawi a. DGP thar chu tawnhriat ngah tak leh Police Officer hmingtha a ni tih a lo hriat thu sawiin, a thiamna leh theihna te chu a hna thar atan hmang tangkai chhunzawm turin a chah bawk.

DGP Anil Shukla chuan ama mimal chungchang, a zirna leh a mawhphurhna lo chelh tawh te Governor chu hrilhin, Mizoram DGP a rawn zawm hnuah Mizoram Police hnathawh te leh hlawhtlinna hrang hrang te uluk takin a bihchiang tawh tih a sawi a. Hmalakna tur leh hmasawnna lai tur nia a hriat te pawh Governor hi a sawipui a ni. DGP chuan Mizoram chu State ralmuang ber a nih chhunzawm zelna turin Mizoram Police ten theihtawp an chhuah zel dawn tih a sawi a. Dan leh thupek kenkawh kawngah pawh a hma aia nasa in tan lak an tum tih a sawi bawk

Mizoram DGP thar Anil Shukla IPS (1996, AGMU Cadre) hi zirna lamah pawh mi chhuan-awm tak niin BE (Civil), Post Graduate (Police Management) leh Masters in Public Policy & Management degree te a nei a. Mahni hnaa inpe mi leh mi thiam a nih avangin International leh National Level chawimawina tam tak a dawng tawh a. DGP, Mizoram Police hna a rawn zawm hma hian ADGP, Andaman & Nicobar Islands hna a chelh a. AGMUT state hrang hrangah Senior Police Officer mawhphurhna chelhin Case liantham hrang hrang a khawih tawh bawk a ni.