Mizo Nationalism champion pui kan tum - Tawnluia

MNF Senior Vice President Tawnluia chuan, “Mizo Nationalism hi champion pui kan tum a ni,” a ti.

MNF party in Mizo Hnam Run-a Chhung Inkhawm nimin-a an neih ah MNF Sr. Vice President Tawnluia chuan MNF chu Pathian tih leh rawn chung zela Mizo Nationalism hi tungding a, Mizo hnam humhim zel turin Zoram rawngbawl turin an ding tih a sawi a, “Mizo Nationalism hi champion pui kan tum a ni, Party dangte neih ve loh hi kan Constitution-ah hian a awm bik a. MNF member kan nihna kan chian a pawimawh a, lalna thuneihna vanga din a ni ve lo a, Pathian leh kan ram tana din a ni,” a ti.

MNF Sr. Vice President chuan UCC chungchang pawh sawiin, India ram chu Secularism, Sakhaw zalenna ram a nih thu leh UCC lakah kan inhumhim angai tih a sawi a. “Kan party pawhin kan duhloh thu kan thlen tawh a, kan MP te, kan President leh sawrkar ang pawhin kan thlen tawh a, he UCC hi Mizorama hmang lo turin kan theih chhung chu kan bei zel dawn a ni,” a ti a. “Kan hnam zalenna sualtu Hnam martar te neitu party hian thangthar zel te dinchhuahna turin an lo bei tawh a, MNF te hian kan nihna a dingnghet tlat tur kan nihna hi i hre thar leh zual ang u,” a ti bawk.