MIMA in Shop and Establishment Acts hman tlak ah ngai lovin dodal zel an tum tih an sawi

Mizoram Merchant Association (MIMA) chuan Shop and Establishment Acts chu hman a nih chuan harsatna hrang hrang an tawk thei nia sawiin, he Dan hi hman tlak ah an ngaih loh thu leh an do zel dawn thu an sawi.

MIMA hian niminpiah khan Executive Meeting neiin Shop and Establishment Acts zawma Minimum Wages hman chungchang an ngaihtuah thu leh Mizote tan a that loh avangin Mizoram-ah hman an duh lo tih nimin khan thuchhuah siamin an tarlang a. “Mizoram-ah Sawrkar hnain min daih tawh lo a, sawrkar hna lak chhun te pawh hlawh tlem te te a ni tlangpui tawh. Mizo thalai, pensioner fate leh mi tam tak an la sumdawng zel dawn. Shop and Establishment Acts hi Semi-Government ai pawha tha mah a ni ang. Sumdawng ten tlin chi a ni lo a, Mizo hnam kal zelah a tha lo tawp a ni,” tiin he Acts hi lo zirchianga lo ngaihven turin mipuite chu an ngen a. State dang pawhin an hman loh laia he Dan hi hmang tura thil awm reng reng chu MIMA in a do zel dawn thu leh hman a tum ngai dawn loh thu an sawi bawk a ni.

MIMA thuchhuah chuan he Acts hman harsatna te tarlangin, Labour-te hamthatna hrang hrang chu a that em em rualin chawlh theihna a pek chu sumdawngte la tlin rih loh thil niin an sawi a, Chawlh an lak kawngah dawr neitute nena inbiakremna awm mai zel chu a tha tawk em em tih tarlangin, he Dan hi hman a nih chuan thil man a to phah dawn thu leh hna thawk an neih angte an hlawh a san dawn avangin ban then-a chhawrr tlem a ngaih dawn thu an sawi a. “Hnathawktu ban kawngah an sual chung chunga ban mai theih lohna dan te hi hman tlakah kan ngai lo a ni. Kan ban anih chuan zangnadawmna pek ngai zui laite hi a fuh lo em em a. Kan dawr-ah pawh thuneihna kan nei tlemin sawrkarin kan hnathawkte a humhalhna lama keimahni tana enkawl har khawp dan hi dan tha a ni kan ti thei lo. Hmantlak ah kan ngai lo a. Kan do zel dawn a ni,” an ti bawk.

Hei bakah hian MIMA chuan he Dan hi lo hmang dawn ta ila, mi tam zawkte chu Loan la an nih thu leh an la nghet lovin an sumdawnna tlachhe thuai thei dinhmunah an la ding hlawm tih an sawi a. “Labour-te hlawh tur, Minimum Wages hi State dangte aiin a sang fal hle a. Sumdawngte hian kan tlin lo satliah mai ni lovin thil theih ah kan ngai lo. Kan hnathawktute zinga a thiam leh a tlingte chu an hlawh a sang hle a. Minimum Wages ang hian an hlawh hi siam dawn ila thawk duh lo tur zawk an awm zawk hial dawn a ni,” an ti a. “Sumdawng ten thawh tur kan neih mila hlawh kan pek mai zel hi MIMA chuan a tha tawk hlein kan la hria a ni,” tiin an thuchhuah ah hian an tarlang bawk a ni.