Kawrthah leh Rengdil inkarah chhan hriat loh in Kuhva phurtu motor lian 2 leh an kuhva phurh a kang

Nimin zing dar 6:30 vel khan Mamit District chhunga Kawrthah leh Rengdil inkarah Kuhva phur motor lian pahnih leh an kuhva phurh bag 120 zet chu a kang a, heng kuhva leh a phurhna motor kan chhan hi chiang taka hriat a ni lo.

Thulakna in a tarlan danin nizan hmasa khan Zamuang paltlang tur Kuhva phur motor a kal thu Hachhek Bial Kuhva Chingtu Pawl (HBKCP) leh Kuhva chingtu mipuiten an dawng a, anmahni kut zala la mai lovin Zamuang Police Check Post-a Police duty-te ngaihchan phawt nise, tiin a rukin enthlatu an insiam a, zan dar 12:00 pelh hretah Truck pahnih in Zamuang Check Post an thleng a, heng motor pahnihte hi Police duty ten Check Post-ah lo tiding mumal lovin an motor number an en a, an kal tlangtir ta mai niin an sawi a. Hetia Police duty ten awlsam taka Check Post an paltlangtir hi hrethiam lovin mipui thinur chuan Kuhva phur motor hi an umzui ta a, Zamuang leh Zawlnuam inkarah manin an hruailet leh a. Hemi hnu zing dar 6:30 vel khan heng lirthei pahnih leh an kuhva phurh hi Kawrthah leh Rengdil inkarah a kang ta a ni.

Zamuang Police Check Post-a duty thin Police zingah mipuiin an rin zawh loh an awm avangin Special Duty tur a ruka ruahman an nih thu HBKCP hruaitute chuan sawiin, Kuhva ro tawlhruk avanga Hachhek mipuite harsatna sukiangtu a nih beiseia Check Post siam a nih dan leh mipuite hmakhua ngaihtuah lova mahni hmasial, mipui tana rintlak loh Police an lo awm chu na an tih thu leh Police fel tak tak kara hetiang lo tlazep hian Police a tihmingchhia a, Police-te lakah mipuiin rinna an hloh phah niin an sawi bawk.

Hemi chungchangah hian Kawrthah SDPO Rozarliana Hmar chuan, Zamuang Police Check Post-a Duty Police-te hian kuhva phur motor hi an tlan chak lutuk avanga an tihdin zawh loh thu an sawi thu a sawi a. Amah ngei pawh Zamuang Police Check Post a thlen vat thu leh HBKCP hruaitute nen an inbiak thu te, dan anga thil kaltir tura ruahmanna an siam laiin kuhva phur motor pahnih a kang tih an hre ta mai niin a sawi a, thil thlen dan report kimchang hi SP Mamit-ah an thawn thu leh he thil thleng avanga FIR an la dawn loh thu a sawi bawk. Thulakna pakhat chuan Zamuang Check Post-ah hian IR pahnih leh MPR pahnih an duty thin thu leh tunlai hian IR hi lakchhuah an nih avangin Police pahnih an duty niin a tarlang a, Kawrthah SDPO chuan Motor leh mihring te chu kawih lo turin campaign an bei nasa hle niin a sawi bawk.

Comments

Popular News (Last 30 Days)

LPG man bithliah thar