Manipur-a kan Unau Zofate Tawrhpuina Punkhawm’ ZoRO huaihawtin naktuk-ah neih a ni dawn

Zo Re-unification Organisation (ZoRO) chuan July 12, 2023 (Nilaini) chhun dar 12:00 hian Aizawl-a Vanapa Hall Kawt-ah ‘Manipur-a kan Unau Zofate Tawrhpuina Punkhawm’ an huaihawt dawn tih sawiin, hetah hian Prime Minister Narendra Modi, Manipur Chief Minister Biren Singh leh Zo tlangval David Thiek lu tantu te lim hal a nih dawn thu an sawi.

ZoRO hruaitute hian nimin khan Aizawl Press Club-ah thuthar thehdarhtute kawmin May 3, 2023 atanga Manipur Maitei leh Tlangmi Zohnahthlak te inkara buaina chuan ni 68 zet a awh ta tih sawiin, Zofate rawt chimih tumna hi a hma atang daiha ruahman lawk a ni tih chu Meitei ho thil tih dan atangin a lang chiang niin an sawi a. “Manipur-a kan unaute nuai chimih vek tuma Meitei mipui ten tharum an thawh a, an Chief Minister Biren Singh leh a uisathiam rual Manipur Police Commando ten theih tawpa an pui-a Zofa tam tak an that leh In leh lo tam tak an hal chhia te, Pathian biakna In hmusit taka an hal chhia te, mi tam takin Meitei laka hliam an tuar te, nunrawng taka an che etc. hi ZoRO chuan lungchhiatthlak a ti,” an ti.

ZoRO chuan May 13, 3023 khan UN Secretary General hnenah Meitei ten Human Rights an bawhchhiat nasat zia leh UN Declaration on the Rights of Indigenous People an bawhchhiat thute ziaka thlenin, UN chu aw chhuah ngei tura an ngen tawh thu leh India President hnenah Memorandum thawn lehin chu lehkha chu Mizoram Governor kaltlangin June 28, 2023 khan President hnenah thawn thlak a ni tawh bawk tih an sawi a. Hei mai bakah hian thuchhuah te siam bawk mah se India sawrkar atangin chanchin lawmawm engmah a awm theih loh thu an sawi a. A dik thei ang ber hriat an duh avanga Fact Finding Committee on Minipur Disturbance an din thu leh Lamka-ah mi intirin July 8, 2023 thleng khan he buaina avanga thi chu mi 124 niin damdawi In-a awm hliam tuar 377, Khaw hal 290, In hal 7247, Biak In leh quarters hal 357 leh raltlan 41,425 an awm tawh thu an sawi bawk.

Hetiang khawpa Manipur State a buai leh thla 2 chuang zet Meitei leh Zofate inkara indona a thlena mi tam tak an thiha In leh lo tam tak tihchhiat a ni leh raltlan tam tak an awm tawh hnuah pawh India sawrkarin beng chhut ngawn san a, buaina tireh tura hma a la lo chu ZoRO chuan a ngai thiam thei lo ti sawiin, “Buaina chingfel tur ni awm taka a dah Para Militaray Force leh Army engemaw zat te lah chu Biren Singh, Manipur Chief Minister thuhnuaiah a dah a, Zofate rawt chimih tumtu ber Biren Singh thuneihna hnuaia Manipur a awm reng hi Zofate tan a him hlawl lo,” an ti a. Chuvangin India sawrkar auh ei nan leh Manipur-a buaina hmeh mih a nih thuai an phutna lantir nan tun thla ni 12 chhun dar 12:00 khian ‘Manipur-a kan Unau Zofate Tawrhpuina Punkhawm’ hi huaihawt an tum thu leh Zofa tupawh, Manipur-a kan unaute tawrhna tuarpuitute zawng zawng chu tel vek turin an sawm thu an sawi a ni.