Hnathawh awm lova cheng nuai 100 ziahral nia sawi chhuichiang turin Lokayukta-ah thlen

Mizoram Pradesh Youth Congress Committee (MPYCC) chuan Deputy Chief Minister Tawnluia Department hnuaia dik lo taka cheng nuai 100 chuang hnathawh awm loa ziah ral chungchang chhui sak tura ngenin Mizoram Lokayukta-ah FIR an thehlut.

Congress Thalai, MPYCC ten Lokayukta Mizoram-a FIR an thehluh ah hian Mizoram Legislative Assembly Speaker Lalrinliana Sailo tunhnaia Maryland, USA zin in Maryland-a Zofa awm te nena an inkawm khawmna ah, Deputy Chief Minister Tawnluia Department hnuaia dik lo taka cheng nuai 100 chuang hnathawh awm lova ziahral a awm thu Chief Minister Zoramthanga leh Deputy Chief Minister Tawnluia te thutdun lai ngei-a a hrilh thu a sawina Video Youtube lama dah a nih thu leh an lo hmuh thu an tarlang a. Youtube Video-a Speaker Lalrinliana Sailo thusawi atanga a lan danah chuan, Mizoram Legislative Assembly Speaker Lalrinliana Sailo hian, kumin January ni 30, 2023 khan MNF Minister leh MLA zawng zawngte an in hmuhkhawmna ah, Chief Minister Zoramthanga leh Deputy Chief Minister Tawnluia te thutdun laiin Deputy Chief Minister Tawnluia Department chan hnuaiah cheng nuai 100 chuang a hmanna awm lo a Department hnuaia thawk la naupang tak pakhat in a kut ngei a JE pakhat awm laia hrehawm ti taka a ziahral thu a hrilh tih Speaker hian a sawi thu leh h thil thleng hi tha a tih loh em avangin an Department chan pawh en uluk tawh turin a hrilh hial niin a sawi bawk tih an tarlang a.

Mizoram Legislative Assembly Speaker meuh in Deputy Chief Minister Tawnluia Department chan hnuaia dik lo taka a hmanna awm lo a cheng nuai 100 chuang ziahral a awm thu a sawi chu MPYCC chuan an ngai thutak hle tih tarlangin, “He thil serious tak Mizoram Sawrkar sum cheng nuai 100 chuang lai a hmanna awm lova ziahral chungchang hi min chhuichhuah sak tur leh a tul anga hma min laksak a, thil ti dik lotu chungah dan anga action min laksak ngei turin kan ngen a che,” tiin an tarlang a ni.