Sawrkar Scheme kalpuina tura Private Bank te sum thehchhuak tha duh lo thil dik a ni lo - Governor

Governor Dr. Hari Babu Kambhampati chuan nimin khan Mizoram-a KVIC hotute kawmin KVIC hmalakna kal mek te chak zawka kalpui dan tur a sawipui a, Private Bank tam takin sawrkar Scheme pawimawh tak tak kalpuina atan pawisa an thehchhuak tha duh lo chu thil dik a ni lo tih a sawi bawk.

Mizoram Governor Dr. Hari Babu Kambhampati hian nimin khan Khadi & Village Industries Commission (KVIC) hnuaia Scheme hrang hrang kalpui a nih dan Raj Bhavan-ah Mizoram-a KVIC hotute a sawipui a, he hunah hian Governor chuan Sawrkar Bank thenkhat Mizoram Rural Bank (MRB), State Bank of India (SBI) leh Mizoram Cooperative Apex Bank (MCAB) ten KVIC hnuaia Scheme kalpui nan beneficiary te chhawmdawlna pawisa hlawm – Margin Money an pechhuak tha nia a hriat thu sawiin, hetihrual hian Mizoram-ah Private Bank tam tak an lo lut a, sawrkar atangin sum hlawm lian pui pui deposit an dawng a, sawrkar Scheme pawimawh tak tak kalpuina atan pawisa an thehchhuak tha duh leh si lo chu thil dik a ni lo tiin Private Bank te pawhin tan la se a duh thu a sawi a ni.

Governor chuan KVIC hmalakna kalmek te chu chak zawka kalpui dan tur leh heng Scheme hrang hrang te lo chhawr tangkaitu an pun zel dan tur te sawipuiin, KVIC hnuaia hmalakna chu chak zawka kalpui a tul hle tih pawh a sawi a, KVIC kaltlanga thingtlang mite tana eizawnna tur siam sak, sumdawnna tenau hmanga bultan duh te tanpuina Scheme leh a dang te chu mipui tam zawkin an la hre lo tih a sawi a. Hemi kawngah hian KVIC hotute chuan Media chakna an hmanthiam a ngaih thu a sawi a. KVIC hotute chu an beneficiary te hnenah an hlawhtlin theihna tur trade thlanpui thin tur leh Mizorama hmanraw tam deuh behchhan industry te sawimawi thin turin thurawn a pe nghal bawk a ni.

Governor in KVIC hotute a kawmna hunah hian KVIC State Office-a Deputy Director Ashish Modak chuan Khadi Vikas Yojana (KVY), Prime Minister Employment Generation Program (PMEGP), Gramogyog Vikas Yojana (GVY) leh SFURTU Scheme hnuai hma-lakna kalpui mek, hmasawnna leh hmachhawp te a lem nen a tarlang bawk a ni.