LESDE Thalaite Department tih hial theih niin sawi

Labour, Employment, Skill Development & Entrepreneurship (LESDE) Department enkawltu Minister Lalchhandama Ralte chuan. “LESDE Department chu thalai te Department tih hial theih a ni,” a ti.

LESDE Directorate Building sak thar leh he Building a awm Mizoram Building & Other Construction Workers’ Welfare Board (MBOCWWB) hnuaia Multipurpose Centre sak thar hawnna hun nimin-a MINECO-a neih ah LESDE Minister Lalchhandama Ralte chuan LESDE Department chuan mipui hriat a hlawh chhoh dan leh thalai te tana nasa taka hna thawk mekin Department pawimawh leh tangkai tak a nih chhoh mek dan te a sawi a, thalai te hmasawnna atan te, an thiamna (Skills) tihpun kawngah leh an chhawr tangkai dan te, Mizoram leh ramchhung nilo ram pawn thleng hna an thawh theih nana remchanna hrang hrang a siamsak bakah kut-hnathawktu Building leh Contruction Workers te tan MBOCWWB kaltlanga hna a thawh dan enin LESDE Department chu thalai te Department tih hial theih a ni, a ti a. Labour & Employment Department a nih laia mi thenkhatin Department ral mek leh hnathawh tur nei tlem tia an sawi thin chu tunhnaia Department in huang a zauh hnu leh Sawrkarin mawhphurhna a pek belh heng - thiamna hrang hrang buaipuitu leh mahni kutkawih hmanga eizawn tumtute dawmkangtu bakah kuthnathawktu building leh contruction workers te hmakhua ngaihtuahtu mawhphurhna pek an nih atangin Department chu nasa taka thangin Mizoram leh thalai te tan kawng tinrengin hmasawnna hrang hrang a thlen mek thu a sawi bawk.

Nimin-a hawn tak LESDE Directorate leh Multipurpose Centre hi Building khat niin Mizopa chhiar-a chawng 9 a ni a, Kawng an hnuai lam Floor-ah Skill Development leh Entrepreneurship lama training na hmun tur te leh trainees te thlen theihna Hostel te, Car parking te a awm a. Kawng an leh a chung lamah Directorate Office a awm a. Ruahtui khawlna leh nizung hmanga building eng mamawh siamchhuah solar panel te dah a ni bawk.

He Building hi cheng vbc. 15 senga sak niin a sak nan Mizoram Sawrkar sum hman a ni lova, Director General (Labour Welfare) Ministry of Labour & Employment in ‘Model Welfare Scheme for Building & Other Construction Workers’ rawn siam hnuaiah Multipurpose Centre hi cheng vbc. 15 project, kum thum chhunga sak tura rel a ni a. He Multipurpose Centre sak nan hian Model Scheme in a sawi angin kumtin Labour Cess tlingkhawm atanga za zelah 20 chu Welfare Board Budget ah kum 2021-2022 atang khan dahin he sum hmang hian sak a ni ta a, CB Engineering ten a sak hna thawkin kum thum chunga sak zawh tura inrem chu huntiam ralhma in sak zawh a ni.

Comments

Popular News (Last 30 Days)

LPG man bithliah thar