Laldenga Thlan-ah pangpar dah

Nimin July 7, 2023 (Zirtawpni) kha MNF Founder Laldenga thih champha vawi 33-na niin Aizawl Treasury Square-a a Thlan-ah MNF Party hotuten Pangpar an dah.

Hemi puala hun hman ah MNF President Zoramthanga chuan ‘Rinna chu an vawng tlat a, rinna neiin an thi ta’ tih changthlanin, “Pu Denga pawh khan kum 1961-a hnam thuthlung an tan a, movement an kalpui lai khan hma lam hun a hmu chiang bik hauh lo. Keini pawh chu tho chu kan ni. Amaherawhchu, chu rinna chu vawng tlatin a thi ta a. Keini pawh chutiang chuan kan thih ve a ngai,” a ti a. “He ram min petu, he hnam siamtu leh min kaihruaitu hian a mipuite hi kan thluthlung angin Pathian tan a ni a, a dawtah kan ram tan. Pathian leh kan ram tan kan ti. Chuvangin kan hnam movement hi Pathian tan a ni. Chu thuthlung chu a rei tulh tulh a, a pawi-mawh tulh tulh a ni,” a ti bawk.

He hunah hian Laldenga (L) fanu Dr. Lalrinzuali pawhin a pa Pu Laldenga'n inremna siam hun lai khan a duh anga thil a thlen lohzia a hrilh thin thu leh a tum ang leh a duh ang hmang hman lova a boralsan thu a sawi a. “Khang hun zawng zawngah khan kan family a number one lem lo. Mizoram tan a nih chuan keini kha chu min sacrifice a hreh lo. Harsatna tam tak kan paltlang a, thuawih takin kan zui thin. Mizoram a hmangaihna ah a tum a thlen dawn chuan a nupui fanaute a number one lo,” a ti a. “A dam rei lo lutuk leh Mi-zoram, a hmuh tum ang leh a indin chhuahna a hmu hman lo erawhin rilru a tina. Pathian in MNF party hi Mizoram dinchhuah nan a din a ni a, chumi kawnga kal zel chu kan tihtur niin ka hria,” a ti bawk.

He hunah hian MNF President Zoram-thanga leh an Party OB te bakah MNF National Core Committee member, Laldenga nupui Biakdiki, Minister leh MLA, AMC Dy. Mayor leh Corporator leh mi thahnem takin pangpar an dah a ni.