Kuthnathawh a hlawhtling turin hman atanga tih phung lo neih te kalsan a tul thin - Chief Minister

Chief Minister Zoramthanga chuan kuthnathawh chu eizawnna hlawhtling a nih theih zia chiang mah ila, rampum hmasawnna tur atan chuan hman atanga tih phung a lo neih tawhte kalsan a tul thin thu a sawi.

Mission Foundation Movement hmalaknaa Reiek RD Block-a Start-up Entrepreneurship Development Programme (SEDP) Model Project kalpui dan leh hlawhtlinna hmuh documentary siam tlangzarhna hun nimin-a CM Office Conference Hall-a neih ah Chief Minister Zoramthanga chuan he thu hi sawiin, tharchhuah a lo tam zawk nan a a remchanna apianga khawl tha hman te, man man zawka thil tharte hralh a nih theihna tura phurh man (transport cost) a hniam theih nan kalkawng siam belh a siamthat te, hlawk zawka tharchhuahte hralh theih nan sawngbawl (processing) hmasak phawt leh adangte chu ngaihtuah tel vek a tul thu a sawi a. Chutiang atan chuan hma pawh sawrkarin a lak thu sawiin, Sawrkar chuan engkim a vaihma vek tur ni lovin, a theih chin chinah privatization kalpui chu a that thu leh sawrkar chuan remchanna siam a, mimal emaw Private Firm in amaha a tih theih loh hna liantham chu a thawh tur a nih thu a sawi bawk.

Chief Minister chuan Mizoram hmasawnna atan chuan kan ram-a kan neih sa, a awm sa hmang tangkaiin kan haichhuah a, remhriatna, taimakna leh tumruhna nen ram hmasawnna hna chu tihlawhtlin theih a nih zia a sawi a. Buh a intodelhna tur ram zau tak a awm thu te sawiin, ruahtui dawhkhawl hmanga kumtluanin kan Lo leh huante hi tangkaia hman a nih theih zia te a sawi a. A taka tumruh leh dawhthei taka bawhzui thiam a pawimawh thu a sawi bawk.

Start up Entrepreneurship Development Programme hi Ministry of Tribal Affairs, Govt. of India in kum 2019 - 2020 chhunga SCA to TSS scheme hnuaiah Social Welfare Department kaltlanga cheng nuai 335 a rawn sanction a ni a. Reiek RD Block, Mamit District (Aspirational District) huamchhunga chhungkaw 300 (Existing Entrepreneur 120 leh New Entrepreneur 180) ten tanpuina hi an dawng a. Mission Foundation Movement (MFM) chu Implementing Agency niin MFM hi Firms and Society hnuaia 2004 khan registered a ni a, Public Health, Skill Development, Rural Livelihood, Women Empowerment, Para Medical Course leh adangte kalpuiin Central sawrkar leh Foreign Agency USAID, JICA te kaltlangin hna a thawk mek a, Project kalpui lai 21 neiin thawktu pawh 120 kan awm mek a ni.