Y-20 Meet on Nationalism, Patriotism & Development khuhhawnna Chief Minister hovin neih a ni

Sports & Youth Services Department leh Mizo Zirlai Pawl (MZP) tangkawp buatsaih ‘Y-20 Meet on Nationalism, Patriotism & Development’ khuhhawnna chu nimin khan Aizawl Vanapa Hall-ah neih niin he hun hmanpuitu Chief Minister Zoramthanga chuan thupui pawimawh tak hmanga Y-20 Meet buatsaih a ni chu lawmawm a tih thu a sawi.

Ministry of Youth Affairs & Sports, Govt. of India chuan India ramin G-20 Presidency a chelh chhunga India ram hmun hrang hranga Youth-20 Programmes a hman chhoh mek chu Mizoram-ah hman ve niin G-20 Secretariat lamin phalna an pek angin heng programme te hi thalaite leh zirlaite hnena Mizoram tan, ram leh hnam tana hmasawnna thil pawimawh tak tak in zirtirna atan kalpui a ni dawn a. Nimin-a a khuhhawnna neih ah hiaan Chief Minister chuan thupui pawimawh tak hmanga thalaite tan Y-20 Meet buatsaih a ni chu lawmawm a tih thu leh nimin-a thupui zinga pakhat nationalism, hnam thinlung chu pawimawh a tih thu a sawi a, hnam thinlung chu hmanlai atang tawhin hnam dangin mahni hnam an chimral loh nan a lo piang leh hnam humhimna atanga lo chhuak a nih thu sawiin, Hmasawnna atana hnam rilru put a pawimawh thu a sawi bawk.

Chief Minister chuan Nationalism leh Patriotism hmanga development a thlen theih dan sawiin, indopui avanga ram pahnih tlachhe vek Germany leh Japan chu tehkhin thu ah hmangin, War Reparation te pe in, economy leh politics lamah chhe vek mahse hnam rilru nghet tak pu in an intungdung leh a, tunah chuan khawvel ram hausa leh changkang ber te zing ami an ni leh tak dan a sawi a. Mizoram pawhin harsatna hrang hrang tawkin sum indaihlohna te lo thleng mahse hmasawnna nasa zawk a la thleng thei tih hria in, hnam hmangaihna thinlung nena ke pen theuh turin thalaite chu a sawm bawk.

He hunah hian khual zahawm Sports Minister Robert Romawia Royte chuan Y-20 Meet duanchhuah a nih dan sawiin, Mizo thalaite mamawh leh an tana tangkai tura ngaih anga buatsaih a nih dan leh Fund source hranpa a awmloh avanga senso tur pawh phal taka State sawrkarin a tum avangin lawmthu a sawi a. Y-20 chu Mizoram pum huamin thalai 21,000 huam tuma buatsaih a nih thu a sawi bawk.

Nimin-a he hun hman hi Sports & Youth Services Department changtu Secretary Dr. Lalrozama chuan kaihruaiin Aizawl a Y-20 Meet khuhhawnna chu District tinah la chhunzawm a nih tur thu a sawi a. MZP President Lalnunmawia Pautu chuan thu a sawi bakah Resource Person mi pathum ten thupui hrang hrang hmangin kalkhawmte hmaah thu an sawi bawk a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man