Hnahthial RD Block Diamond Jubilee lawmin DRDO Office Building thar hawn a ni

Hnahthial RD Block kum 60 tlinna, Diamond Jubilee lawmna chu nimin khan neih niin RD Minister Lalruatkima chuan a hmanpui a, Minister hian Hnahthial-a DRDO Office sak thar chu a hawng nghal bawk.

Hnahthial RD Block Diamond Jubilee lawmna leh DRDO Office building hawnna hunah hian RD Minister chuan RD Department chu mipuite rinchhan leh innghahna Department a nih angin khawtlang mipui leh pawl hrang hrang te, Kohhran te pawhin an pan rawn a ni, tiin Department hnathawktute chu rawngbawlna thinlung pu turin a fuih a. Jubilee lawm chuan mipuite tana malsawmna thlentu ni zel turin department-ah rah tha chhuah se a duh thu a sawi bawk. RD Minister chuan DRDA Office ni thin kha Central sawrkar-in state sawrkar mawhphurna ah a dah tak avangin DRDO-ah leh a lo ngai ta tih sawiin, Covid hripui leh harsatna hrang hrang karah State sawrkarin mahni sum intum chawpa DRDO Office kalpui tura ruahmanna siam a ngaih tak thu a sawi a. District hrang hrangah DRDA Office hnathawktu awmsa te chu a theih ang anga absorb an nih thu leh District thar 3 zingah Khawzawl leh Saitual-ah te DRDO hawn a nih hnuah Hnahthial DRDO hawn theih a lo ni ve leh ta chu lawmawm a tih thu a sawi bawk.

Lalruatkima chuan a Department chan dang Revenue-ah Hnah-thial District tana hma la turin Settlement Officer leh Surveyor 1 te dah a nih thu sawiin, sawrkar thu leh hla puangzara DC te tawiawm turin District IPRO pawh dah a nih thu leh hna an zamw tawh thu a sawi a. Heng atana Hnahthial DC ten hma an lo lakna ah lawmthu a sawi bawk.

He hunah hian Hnahthial District Bawrhsap R. Lalremsanga chuan kum 2019 August thlaa Hnahthial District hawn a nih atanga sawrkar Department hrang hrang hawn a nih dan sawiin, District hawn hnu kum hnih chhung chu Covid hripui vangin sawrkarin hma a lak theih loh hnuah kum 2022 July thla ah District Treasury Office hawn a nih thu a sawi a. Tunah hian sawrkar Department hrang hrang DFDO Office, DVO Office, EE PWD Office leh DRDO Office te hawn ni tawhin Sericulture leh DCPO Office te hawn thuai theih beisei a nih thu bakah DCSO Office chu hun reilote ah hawn tura beisei a ni tih a sawi a. DTO leh DLO te pawh hawn thuai theih beisei niin Office awmsa engemaw zat District Office-ah hlankai a nih thu a sawi bawk.

Nimin-a hawn tak Hnahthial DRDO Office building hi cheng nuai 169.68 senga sak niin September 11, 2021 khan hna tan a ni a. June 24, 2023-ah sak zawh niin tunah hian Hnahthial DRDO Office-ah hian Project Director tiamin thawktu Officer leh Staff 17 an awm mek a ni.