Inthlanpui ah thalaite avangin hnehna chan ngei kan inbeisei - Vice President, MNF

MNF Vice President Vanlalzawma chuan Mizoram in inthlanpui kan hmachhawn turah thalaite avangin hnehna chan ngei an inbeisei tih a sawi.

Mizo National Youth Front (MNYF), Headquarters in Falkawn Mayflower Park-a Political Training nimin-a an neih a hmanpuina ah MNF Vice President Vanlalzawma chuan Mizoram politics virvel thlirin MNF chuan sawrkarna a chang leh ngei dawn tih a langchiang chho zel nia sawiin, “Mizoram hmuntin mai a MNF hmasawnna hi a lawmawm takzet a ni,” a ti a. “MNF hi Mizo thalaite ta leh thalaite din a ni a, Mizoram in inthlanpui kan hmachhawn turah pawh thalaite avangin hnehna chan ngei kan inbeisei a ni,” a ti bawk.

He hunah hian MNF Treasurer K. Vanlalauva pawhin Mizo Nationalism vawng nung theitu chu thalaite an nih thu leh hnam innghahna an nih thu a sawi a. MNF Adviser Lalchhandama Ralte pawhin MNF chu Mizo hnam tana din a nih thu sawiin, “Zofate rorelna pakhat hnuaia kan awm theihna tur atana din a ni. MNF hi party zawng zawngah hruaitu nei tha ber kan ni a, kan hruaitute hian MNF an zawm atangin party dangah vawikhat mah an la pakai ngailo. Hei vang hian principles nghet nei a ni a, Pathian min pek ram humhim tura min pek a nih avangin MNF hi a hlu bik hle,” a ti bawk.