Minister leh MLA ten MHIP Day hmanpui

MHIP Day vawi 49-na nimin-a lawmna chu Minister leh sawrkar mi pawimawh ten hmun thenkhat ah an hmanpui.

Chief Minister Zoramthanga chuan Zemabawk North leh Thuampui-a MHIP Day lawmna hun hmanpuiin MHIP chu MUP leh YMA nen Mizoram in tlawmngai pawl lian a neih pathum, ramin a vanneihpui phah em em te zing ami a nih thu a sawi a, MHIP member te chu inchhung enkawltu pawimawh an nih avangin khawtlang nunah pawh an pawimawh thu a sawi bawk.

Deputy Chief Minister Tawnluia chuan MHIP Day lawmna hi Khawzawl Arro Veng Branch-ah hmanpuiin an Branch Silver Jubilee lawmna neih nghal a ni a, khawvel thang leh changkang zelah hmeichhia te'n nasa taka hma an sawn chu lawmawm a tih thu sawiin, zirna leh hnathawhna hmun hrang hranga an hmasawn dante a tarlang a, he huna kalkhawmte chu Mizo hnam ziarang, tawng, incheina leh nunphung thate chawisanga chhawmnung zel turin a sawm bawk.

I&PR Minister Lalruatkima chuan Aizawl Kanan, Tuikual South leh Dinthar Branch ten MHIP Day an lawmna hmanpuiin kum 1974-ah nu thahnemngai tlemte ten MHIP chu an din thu leh, Mizo hmeichhiate hmasawnna tur leh chawikanna tura he hmalakna chu malsawma awmin, Vawiin-ah chuan Mizo hmeichhiate chu khawvel zau zawka hmeichhe dangte nena tehkhin pawhin an duai tawh lo hle a ni, a ti.

Health Minister Dr. R. Lalthangliana chuan Sialhawk Branch MHIP ten MHIP Day an lawmna Sialhawk Community Hall-a neih chu hmanpuiin Nu tha in fa tha a hring thin tih chu a hmuh dan a nih thu sawiin, “Kan neih hlu ber kan fate kan hloh si chuan sum dehchhuah tam leh hausakin awmzia a nei lovang. He leia kan ro thil neihte ai hian ka Pathian laka kan rochan kan fate hi an hlu zawk a ni,” tiin kalkhawmte chu a fuih bawk a ni.

Agricutlure Minister C. Lalrinsanga chuan Lunglei Venglai Branch MHIP ten Convention Centre Hall, Lunglei-a MHIP Day an lawmna hun hmanpuiin kan ram leh hnam hmasawnna tur leh a chhelai te siamthatu chu MHIP te an nih thu a sawi a, “Pathian thu keng nung tur chuan nu te hi an pawimawh a, tunlai khawvel hmasawnna thangduang karah hian Pathian tihna tak tak nei turin kan tu leh fate kaihhruai a ngai,” a ti bawk.

Mamit bialtu MLA Er. H. Lalzirliana chuan Mamit Chhim Veng Branch-ah MHIP Day hmanpuiin Lunglei East bialtu MLA Lawmawma Tochhawng chuan Lunglei Zobawk Vengchhak-ah a hmanpui a, Aizawl West-III bialtu MLA VL. Zaithanzama chuan Khatla Branch-ah a hmanpui bakah Aizawl North-II bialtu MLA Dr. Vanlalthlana chuan Ramhlun South-ah leh Aizawl South-II bialtu MLA Lalchhuanthanga chuan ITI Branch-ah te an hmanpui bawk a ni.