Aizawl Smart City Limited hnuaia din ICCC chu Aizawl khawpui-ah hman tan a ni

Aizawl khawpui chhunga lirthei tlan dan leh chetvel dan hrang hrang en theihna tur Integrated Command & Control Centre (ICCC) chu nimin khan a taka hman tan a ni ta a, ICCC a taka hman tanna, go-live hun hi UD&PA Department changtu Deputy Chief Minister Tawnluia hovin Treasury Square-a ICCC Pisa-ah neih a ni.

Aizawl Smart City Limited hnuaia din Integrated Command & Control Centre (ICCC) hman tanna hunah hian Deputy Chief Minister Tawnluia chuan Aizawl Smart City hnuaia project nghahhlelawm tak a taka hman theih tura peihfel a ni ta chu lawmawm a tih thu sawiin, kum 8 kalta atang khan India ram puma khawpui 100 thlangin Smart City Mission hi kalpui a nih thu leh Khawpui tih changtlun leh tihchangkan chu he Mission tüm ber a nih thu a sawi a. Mizoram pawh kum 2018 khan pawm a nih thu leh Aizawl khawpui thuam mawi a tih changkan nan tun dinhmun ah project 30 chuang kalpui mek niin Smart City hnuaia hmalakna te chu kum 5 chhunga zawhfel tur tih a nih laiin Covid avangin kum khat dang pawhsei niin nakum a zofel turin nasa taka an kalpui mek thu a sawi bawk.

Integrated Command & Control Centre (ICCC) Project Cost hi cheng vbc. 117.98 niin March ni 7, 2020 khan Contract Agreement ziah a ni a. Control Room, Conference Room, Reception Area, Operator Room leh Data Centre changkang leh changtlung tak te a awm a. Vantlang mipui tan a thlawna hman theih tur WiFi hmun 15-ah bun niin Surveillance Camera hmun 76-ah bun a nih bakah Fixed Camera 236 leh Pan Tilt Zoom (PTZ) 39 a awm bawk a. Khawpui kawtchhuah pawimawh hmun 14-ah Automatic Number Plate Recognition (ANPR) Camera dah niin, Facial Recognition System khawpui chhung hmun pawimawh 5-ah leh khawpui chhung hmun 4-ah Environmental Sensor dah niin rukruk leh thil bo chhuina atana tangkai tura ngaih a ni.

Heng bakah hian Bawlhhlawh paih motor 140-te Monitor-na tur GPS hmang Solid Waste Management Application Dashboard bakah Aizawl khawchhung chanchin hriat zung zung theihna Variable Messaging Display' hmun 4-ah dah a ni a. ICCC hi kum 5 chhung MSI&SI chuan an enkawl zui dawn a ni.