Indoor Stadium sakna tur lungphum CM in a phum

Zuangtui-a Indoor Stadium sakna tur lungphum chu Inrinni khan Chief Minister Zoramthanga chuan a phum a, he Indoor Stadium-ah hian Badminton Court 6 awm thei tura ruahman a ni.

Aizawl Smart City Limited hmalakna hnuaia cheng vbc. 15.05 senga sak Indoor Stadium sak tur lungphum phumna hunah hian Chief Minister Zoramthang chuan Badminton khelmi te tana tangkai tak tur, Court 6 lai awmna Indoor Stadium atan lungphum phum a ni chu lawmawm a tih thu sawiin, khawtlang leh State angin Badminton ah hma kan sawn phah ngei beiseiawm a tih thu a sawi a. Hmasawnna ruhrel tha din hian a pawimawhna zar zova hmasawnna dang a thlen belh thin dan sawiin, he Indoor Stadium pawh hi Zuangtui leh a chhehvel Veng tan Sports lamah mai bakah sumdawnna leh thildangah hmasawnna engemaw tala a thlen phah a beisei thu a sawi bawk.

Chief Minister chuan helai bial hi an vanneih thu sawiin, sawrkar ram hmun ruak a la tam avangin sawrkar tan hmasawnna ruhrel liantham tak tak dinna atan a thlanawm hle tih a sawi a. Sawrkar laipuiin cheng vbc. 127 a sanction na India ram hnam hrang hrangte inpumkhatna tur atana hmalakna pakhat, Unity Mall sakna tur atan pawh Zuangtui bawk hmun remchang a nih dan te, helai hmun hi a la pawimawh chauh dawn avanga kawng zauh leh siam hna thawk tur leh thil dang dangah ruahmanna siam a nih thu te a sawi bawk.

UD&PA changtu Secretary Lalmalsawma kaihhruai he hunah hian khual zahawm Sports Minister Robert Romawia Royte pawhin Mizote infiamna khawvelah kan chim chin a sang zelin, Badminton-ah pawh National Junior Category-ah Champion te an awm chhoh tak thu a sawi a. Badminton-ah India Ranking a that avangin National Level-a Champion chu International Level-ah pawh an tha thawkhat viau tih a hriat thu leh thalaite tan sum lakluhna kawngah pawh a hlawk thlak thu a sawi bawk.

Zuangtui-a Indoor Stadium sa tur hian F. Lalliansanga, Aizawl Venglai chu thlan niin June ni 17, 2022 khan hna thawh tan a ni tawh a, ruahmanna ang chuan thla 18 chhung a zawh hman tur a ni. Tunah hian a sak nan cheng vbc 2.06 hman tawh niin physical progress chu 29.09% a ni. Indoor Stadium-ah hian Badminton Ccourt paruk (Court area 6.10 x 13.50 m theuh) leh gallery mi 345 thut lenna tur a awm dawn a. Ground Floor-ah lirthei ke pali nei 33 leh ke pahnih nei 39 lenna tur Parking Area ruahman a nih bakah Ticket Counter, Admin Room, Cafeteria, Pantry, Toilet block, Pump room, Chowkidar Room, Store room leh a dangte dah tum a ni a. First Floor chu Gymnasium, Dormitory, Changing & Locker Room, First Aid Room, Coach Room, Yoga Room leh dangte atan ruahman a ni.