August 2023 chhungin SEDP sem hman tum niin chhungkaw 60,000 te tanpui tum an ni

Mizoram sawrkar Flagship Programme, Socio Economic Development Programme (SEDP) Family Oriented-a 2nd Phase hmu tura thlan te hnenah August 2023 chhungin sum pek hman tum a ni a, 2nd Phase-ah hian chhungkaw 60,000 hnenah tanpuina sum hi pek tum a ni.

Mizoram State Planning Board Vice Chairman H. Rammawi chuan SEDP sum chu awm tawh mah se tihfel ngai a la awm avangin a dawngtu turte hnenah sum hi pek theih a la ni lo tih a sawi a. “List la tihfel chiah loh te a awm avangin sum hi a dawngtu turte hnenah pekchhuah mai theih a la ni lo a. Pek hun tur hi a la hriat chiah lo a, August 2023-ah chuan peih hram kan tum a ni,” a ti a. SEDP sem dan tur zawhna chhangin, “Benefiaciary te hnenah hian a tum khatna atan Rs. 25,000 hi an account-ah thun phawt kan tum a, 2nd installment pawh sum awmsa anih avangin a rang thei ang bera pek leh kan tum a. Mahse Department lamin buaipui ngai neuh neuh an neih thin avangin 2nd installment pekchhuah hun tur tak erawh sawi mai a har hrih deuh,” a ti bawk.

SEDP 2nd Phase-ah hian Mizorama chhungkaw tam ber chu thun (cover) theih an beisei tih H. Rammawi chuan sawiin, “Thingtlang lamah chuan a dawng thei tur awm chu a nawlpui chuan kan cover theih vek kan beisei a, mahse Aizawl District leh hmun thenkhat chu kan la tuam zo lo deuh dawn a. Heng mite tan SEDP 3rd Phase tur hi a awm dawn leh dawn loh a la hriat loh a ni,” a ti a. SEDP First Phase dawng tawh te sum pekbelh an nih dawn leh dawn loh chungchangah kumin budget ah dah anih loh avangin kumin sawrkar kumah chuan pekbelh an ni dawn lo niin a sawi bawk.

Socio Economic Development Programme dawngtu ten a nihna anga an sum dawn te an hman leh hman loh chungchang vilzui chungchangah thawktu indaihlohna avangin hmalak a harsa tih sawi bawkin Planning Board Vice Chairman chuan, “Planning Department chuan mi leh sa kan neih tlem avangin umzui turin hma kan la thei lo a. Vilzui hna hi District Level Committee kut anih bawk avangin keini chuan hmalakna kan nei lem lo a ni,” a ti a. SEDP First Phase-ah Account number leh House number inang a tam avangin harsatna an tawk nia sawiin 2nd Phase-ah erawh a ziaawm deuh nia a hriat thu a sawi bawk.

Tarlan tawh thin angin SEDP hnuaiah hian Line Department 9 awmin, chung te chu Agriculture, Horticulture, Animal Husbandry & Veterinary, Fisheries, Sericulture, Land Resources, Soil & Water Conservation, Commerce & Industries, Urban Development & Poverty Alleviation leh Tourism Department te an ni a. SEDP First Phase ah chhungkaw 60,000 te hnenah tanpuina sum pek niin sum hi tum hnih ah Rs. 25,000 ve ve a pein a vaiin Rs. 50,000 an dawng tawh a, 2nd Phase-ah hian chhungkaw 60,000 dang hnenah tanpuina hi sem leh tum niin hei pawh hi tum hnih Rs. 25,000 ve ve in beneficiary account-ah thun tum a ni. 

Comments

Popular News (Last 30 Days)

LPG man bithliah thar