Hriselna lama hmalakna tarlang

Sawrkar laipui-a Ministry of Health & Family Welfare leh Uttarakhand sawrkar tangkawp buatsaih Conference of Central Council of Health and Family Welfare (CCHFW) vawi 15-na chu Zirtawpni khan Hyatt Regency, Dehradun, Uttarakhand-ah neih tan niin Mizoram atanga tel Health Minister Dr. R. Lalthangliana chuan hriselna kawnga Mizoram sawrkar hmalakna hrang hrangte a tarlang a ni.

Ni 2 awh tur thutkhawm tan ni-ah hian Health Minister chuan NITI Aayog in tehfung chi hrang hrang hmanga a tehnaah kum 2017-2018 atang khan Mizoram chu India rama State tenau zingah hriselna tihhmasawn kawnga hma la tha ber pakhatna dinhmun a hauh ta ziah tih tarlangin, Mizoram chu nau piang kum 1 hnuaia lam (1000 zela chhutin) thih tlem berna State a nih mek thu a tarlang bawk.

Sawrkar laipui leh Mizoram sawrkar Scheme hrang hrang kalpui mek bakah World Bank tanpuinain Mizoram Health Systems Strengthening Project (MHSSP) kalpui a nih thu Health Minister chuan sawiin, damdawi In quality tha leh rintlak neih tuma hmalakna ah District Hospital 3, PHC 3, UPHC 2 leh HWC-Sub-Centre 75 te tan National Level NQAS certification dil mek a nih thu a tarlang a. Mizoram sawrkar hmalakna Mizoram State Health Care Scheme (MSHCS) chungchang tarlangin, Health insurance tih changtlunna atan Asian Development Bank (ADB) nen cheng vbc. 1000 senna tur project an siam thu a tarlang bawk.

Minister chuan Mizoram chu India rama cancer chi hrang hrang vei tamna ber a nih thu tarlangin, he natna bei let tura tan lak a nih dan te a sawi a, Japan International Cooperation Agency (JICA) nen cheng vbc. 700 project - Mizoram State Super Specialist Cancer Research Centre (MSSSCRC) dinna tur a hmawr an bawk ttep tawh thu a tarlang bawk.