Dawt puangzar/thehdarh anga puh an nihna MJA Kolasib District in an ngai thutak tih an sawi

Kolasib District MJA te chuan chanchinbu mite dawt puangzar/thehdarh anga puh an ni chu Mizoram Journalist' Association, Kolasib District hmai ti bal thei a nih avangin an ngai thutak (serious) hle tih an sawi.

Nimin-a thuchhuah an siamah MJA Kolasib District chuan Krishi Vigyan Kendra (KVK), Kolasib ram Inhmun atana theh tumna awm mekah MNF Kolasib Block Press Release (No. 124/IT&P, MNFKLB/2019-2023)-ah chanchinbu mite chu dawt puangzar/thehdarh anga puh an nih thu sawiin, July 14, 2023 khan Emergency Meeting an nei tih tarlangin, “KVK, Kolasib ram-ah In hmun theh tumna a awm ni a kan hriat avangin chanchinbumi thenkhat te chuan thil awmzia hriat tumin July 6, 2023 khan a hmunah an tlawh a. KVK ramah hian In hmun thehna tur perh (peg) tam tak khen a ni tih an hmu a. A hmuna tlawhtute hian khawtlang hruaitu thenkhat te an bia a, thil awmdan an zawhchian hnu ah he thil hi Vengthar MNF party hotute hmalakna a nih thu dawn a ni,” an ti a. KVK lam pawhin an hriat loh a perh (peg) khen a nih avangin dan lova ram chhuh luih tumna (encroachment)-ah an ngaih thu sawiin, “Mi thenkhatin party pakhat Press Release behchhana puangzar anga min sawina hi 'dawt' a ni a, eng party in nge KVK ram chungchangah hian Press Release siam kan la hre lo. A hnuah Kolasib bialtu MLA Pu K Lalrinliana, Minister hian helai ram hi a tlawh tumin ama tih tir a nih thu a sawi a ni,” an ti.

Kolasib District MJA te chuan In hmun neilo ten In hmun an neihna tura hmalakna chu an dodal lo tih sawiin, “In hmun neilo tak tak leh mamawh ngawih ngawih; khawtual mi nghet ngei ten In hmun hi nei ngei se kan duhpui zawk a ni,” tiin chumi kawngah chuan sawrkarin 'dan' a neih angin 'dan' angin engkim kal tir hmasa in hmalak ni thin se tih chu an duhdan a ni tih an sawi a. “Kan beisei loh leh kan rin loh tak maiin kan Minister zahawm tak chuan Kolasib District MJA te chu dawt puangzar/thehdarh a, eptu party ang hiala min puhin, MJA member te chu kan awmna party nen lam a hriat vek thu, amah tawiawmtu Official leh Party Workers te hriat laiin a sawi chiam mai hian min barakhaih takzet,” tiin, hemi tuma video clip, a thena zar chauh lang tura duhlai lai 'cut then' chu thehdarh a nih thu an sawi a. Kolasib District MJA member te chu mi famkim leh fel bik an ni lo tih an in hriat thu leh tlinlohna pawh nei thei an nih thu sawiin, “Chutih rualin chanchinthar thehdarh kawngah a pawng-a takin thudiklo leh dawt kan chhuah kan la hre ngai lo. Inhnialna tichhuak thei chi angah te phei chuan thu lakna (source) rintlak kan neih loh chuan kan puangzar ngai lova, KVK, Kolasib ram theh tumna awmah pawh hian department hotute berin an hriat loh avangin keini chuan dan lova ram neihsak tumna (encroachment) niin kan hria a, source rintlak tak neiin kan puangzar mai chauh a ni,” an ti bawk.