Hri vangin Kel 205 leh ramsa beih vangin Sial 12 thi tawh

Tunhnaia Serchhip District chhung khaw 2 a Kel hri leng avanga Kel thi chu 205 a tling tawh a, heng khaw pahnih ah hian Kel thi lo 24 chauh a awm tawh a ni.
Serchhip-a AH&Vety Department hotute hnen atanga thu kan dawn danin tun-hnaia Serchhip District chhunga Thinglian leh Lung-pho khuaa Peste Des Petits Ruminants (PPR) hri vanga Kel thi hian ziaawm lam a pan tawh a, Report hnuhnung bera a lan danin Lungpho khua ah hian Kel vulh sa awm lovin Kel 56 sem a ni a, heng zinga 43 te thi hri vang hian thiin tunah hian Kel 13 te chu an la dam a. Thinglian khua ah Kel 92 semin 85 te chu hri vang hian thiin Kel la dam 7 a awm a, Thinglian khua hi Kel vulhna khua ni sa in a hmain khawtual-ah Kel 81 a awm a, heng zinga 77 te chu hri vang hian thi bawkin Kel 4 te chu a la dam a, Thinglian bikah hian Kel sem leh an vulh sa 173 atangin Kel 162 thiin tunah hian Kel 11 ala awm mek bawk a ni.

Tunhnaia Serchhip District chhung Sai-lulak khuaa Sial vulh te Chinghnia nia hriat in a beih chungchangah AH&Vety Department hotute chuan a theih anga an buaipui thu sawiin, report pawh an lakkhawm thu an sawi a. Amaherawh chu ramsa kut tuar an nih avangin Forest Department lamah thlenin anni hian sawrkar hotute hnenah an thlen ve leh thin thu an sawi bawk.

Sailulak khuaa Sial vulhtute chuan nimin thleng khan Chinghnia in a beih avanga thi nia hriat Se ruang 12 an hmuh tawh thu LENKAWL hrilhin, hei aia tam zawk hi hmuh loh an neih an la rin thu an sawi a. An Se vulh te hi Chinghnia laka an him theihna turin a khalhkhawm hna an thawh mek thu leh a then phei chu km 17 vela hla atanga khalhkhawm te an nih thu sawiin, hei vang hian sawrkar (Forest) lama report pawh an la buaipui hman loh thu leh nikum lamah erawh tanpuina an hmuh thu an sawi a. An Sial te beitu Chinghnia pakhat thang hmanga an awk nia sawi chu an hriatpui loh thu leh hetiang hi a awm an hriat loh thu an sawi bawk.