Serchhip-ah Remna ni vawi 37-na SW&TA Minister hovin hman a ni

MNF ten zalenna an sual avanga Mizoram in rambuai a tawh hnua India sawrkar leh MNF ten Remna thuthlung an ziahna ni champha, Remna ni vawi 37-na chu nimin khan Serchhip-ah urhsun taka hman niin Social Welfare & Tribal Affairs Minister Er. Lalrinawma chuan khuallian niin a hmanpui a ni.

Remna ni puala inkhawm Serchhip DC Conference Hall-a neih ah hian SW&TA Minister Er. Lalrinawma chuan Pathian in Hnam tinte min dinin, ram leh ziarang min pe hlawm a, ramri min kham sakin mahni Hnam rilru pu lo te hnenah rorelna pawh a pe ngai meuh lo tih a sawi a. India ramin zalenna a hmuh dawn khan Mizoram chu dinhmun chiang lo takah a awm thu leh kan hruaitu ten uluk taka ngaihtuahin kum 10 hnua ngaihtuah leh turin kum 1947 khan an lo rel tawh thu a sawi a. Kum sawmhnih a lo nih chuan Pathian in Laldenga hmangin kan ramah hnamthlipui a lo tleh tir thu sawiin, “Zalenna kan sual a, hnam hmangaihna thinlung dik tak kan pu ta hlawm a ni,” tiin Khawvel a Hnam dingchhuak ni turin Hnam a harh a pawimawh thu leh rambuai vanga Mizote-a hnam-a chianna leh hmangaihna dik lo awm dan leh chumi hlutzia te chu a tarlang bawk.


Er. Lalrinawma chuan Rambuai kha kan tuar thlawn lo tih pawh sawiin, “Kan inremna thu chuan kan Sakhua leh Hnamzia humhim tura thuneihna min pe a, Parliament-ah lo pass pawh ni se kan Sakhua leh Hnam thu ah engmah min barhlui ngawt thei lo,” a ti a, “Hetianga invenhimna tha tak kan neih chhan hi Remna thuthlung vang a ni a, University, India rama a tha ber pawl kan neih chhan te, High Court kan neih chhan te, Inner Line Permit hmanga ven kan nih dan te, Special Category kan nih chhan te, kan In leh lo leh ram, hnamdangte hnena kan hralh theih loh chhan te uluk taka kan ngaihtuah chuan Remna thuthlung vang zel a lo ni,” tiin “Remna boruak hlu tak hi kan ram leh hnam hian tangkai taka kan hman theih nan mitin in mahni zawnah theuh theihtawpin hna i thawk teh ang u,” tiin mipuite chu a sawm bawk a ni.

Serchhip-a Remna ni puala inkhawm hi I&PR Department-a Deputy Director leh Serchhip DIPRO K. Saitluanga chuan kaihruaiin Serchhip Addl. DC James Lalnithanga chuan kumin a Remna ni hmang tura inbuatsaihna leh hun hman dan te a tarlang a, Remna ni pual hian a thlawna thisen pekna hun tun thla ni 14 atanga buatsaihin thisen Unit 72 pek a nih tawh thu te, nimin khan Buangpui-ah Health Camp neih a nih thu te, June 20-ah Higher Secondary School tan Essay Competition leh June 21-ah High School tan Quiz Competition neiin heta pakhatna Govt. JM H/S chu Mizoram pum intihsiakna ah pathumna an nih thu te, nimin khan VC hrang hrang ah Faina hnatlang neih a nih thu te, thingtiak phun beihpui thlakin thingtiak 200 vel phun a nih thu te, nimin zing-ah Peace Walk neiin Remna ni hmanna ah hian Photo Exhibition neih a nih thu te a sawi bawk.


Nimin-a Remna ni puala inkhawm ah hian Govt. Serchhip College-a  Asst. Professor K. Lalrinchhana chuan 'History & Significance of Remna ni' tih thupui hmangin Mizoram in rambuai a tawh chhoh dan leh remna leh muanna kan neih chhoh dan te a lem nen entirin a sawifiah a. PAMRA Serchhip District aiawhin an Adviser Hmangaihzauva leh Joint NGO aiawhin an Chairman Kawl-thuama te pawhin thu an sawi bawk a ni.

Remna ni puala High School te tana Quiz Competition-ah hian Lalhlimpuii leh Lalduhzuali, Govt. JM H/S te chu pakhatna niin David Lalsangkima leh R. Vanlalhriati, Govt. Chhiahtlang H/S chu pahnihna an ni a, Lal-ramdintluangi leh PC. Lalremruati, PES Ser-chhip chu pathumna an ni bawk. Higher Secondary School zirlaite tana Essay inziahsiakna ah Joseph Lalrinfela, North Vanlaiphai HSS chu pakhatna niin Vanlalremtluangi, GHSS leh Lianbiaksanga, EMRS Serchhip chu pahnihna leh pathumna an ni bawk.

Comments

Popular News (Last 30 Days)

Vawiin-ah HSSLC Exam result