LESDE leh TiLi in Entrepreneurship tih hmasawnna atan thawhhona thuthlung an ziak

Labour, Employment, Skill Development & Entrepreneurship (LESDE) Department leh Tharthilthlentu - Entrepreneurship & MSME Support (TiLi) te chuan Mizoram-a Entrepreneurship leh Startup lama hmasawn nan leh tih changtlun leh zual nan nimin khan thawhhona thuthlung an ziak.

He Inremna thuthlung hi kum khat chhung atana ruahman phawt niin Entrepreneur leh Startup-a Mizo thalai ten hma an sawnna turin LESDE leh TiLi te hian hmalakna an kalpui dawn a. He programme-ah hian TiLi Incubator chu startupindia hnuaia awm tura thlanchhuah a nih angin hnathawk tan tura hawnna hun hman tel nghal a ni bawk a, ISMC Chairman Mark Lalduhsaka chuan Incubation Seed Monitoring Committee (ISMC) chungchang a sawifiah bakah Mizoram Skill Development, Entrepreneurship leh Startup dinhmun-te sawiho a ni bawk.

LESDE Conference Room-a thawhhona thuthlung an ziah ah hian LESDE Secretary leh TiLi Chairman te chuan an hming an ziak a, LESDE Secretary Lalramsanga Sailo chuan TiLi te chu Entrepreneurshp bika thawhpui tura inremna thuthlung an ziah pui hmasa ber an nih thu sawiin, LESDE Department-in Skill Development hmalakna a neih te a tarlang a, thalai te tan Skill Development leh Entrepreneurship lama bung thar kaipui turin TiLi-te chu a sawm bakah thahnem ngai taka Mizo thalaite tana an theihna hmangchhuak turin a sawm bawk a ni.

He hunah hian TiLi Chairman LTL Fela chuan, Tharthilthlentu te hian Mizote hian Mizoram chhung chauh a hma la mai loin, India ram bakah, khawvel huapah pawh Mizo thalaite hian kan thlen phak ve theih thu sawiin, tuna Startup India hnuaia Official Incubator an nihna pawh rampawn thleng phak a hman ngei an tum thu a sawi bawk.