Er. Lalrinawma’n Tlungvel-ah MHIP Day a hmanpui
Tlungvel Venghlun YMA Hall-a MHIP Day lawmna ah hian bialtu MLA Er. Lalrinawma chuan Mizo hmeichhia te ngaihsan leh an ngaihhlut ten kan nunah nasa takin nghawng a neih thin tih sawiin, chuvang chuan ngaihsan tur dik kan ngaihsan a pawimawh thu a sawi a, “Chhungkua, ram leh hnam hmasawnna kawngah in pawimawh em em a ni. Zirna hmasa ber chu chhungkua a ni a, chhungkua enkawlna mawhphurtu pawimawh ber chu nu te hi an ni. Nu, fanau tha tak tak enkawl puitlingtute ngei hi ram tana mi tangkai leh pawimawh tak tak min petu, khawtlang leh Kohhran tana mi hlu tak tak min petute an ni,” tiin nute hlutzia a sawi bawk.
Er. Lalrinawma chuan zirna chu chhungkua atanga intan a nih avangin hriselna te, nundan mawi te, mi rintlak leh hmantlak ni tura thangtharte buatsaihna hmun ril ber chu chhungkua a nih thu a sawi a, chu chhungkuaa mi pawimawh ber chu nu te an ni tih sawiin, Sawrkarin hmeichhiate ven-himna dan tha tak tak a siam thu a sawi a, “Inneih inthen thuah pawh Mizo hnam dan fel tak kan nei a, ka zavaia kan hriatchian a tha hle a ni,” a ti.
Minister chuan ruihhlo in nasa takin kan thalaite a run mek avangin a dona kawnga theihtawp chhuahpuiah MHIP te a sawm bawk a, Mizo ten kan tawng leh kan hnam ziarang kan hloh telh telh nia a hriat thu pawh sawiin, hnam nunphung leh ziarangte chawinung zawng leh mi hmasate chawimawi thiama mahni hnam thil ngaihsan in zirtir zel a duh thu pawh a sawi bawk.
Tlungvel Branch MHIP hi Thingsulthliah Block huamchhunga awm niin an Block-ah hian Branch 14 an awm a. Tlungvel Venghlun Branch MHIP-ah hian members 355 awmin kumin chhungin member thi mi pathum (3) an nei tawh a, heng mite sunna hun hi hman a ni bawk.
Comments
Post a Comment