Tripura mi Mizoram-a Vote nei E. Roll-ah paih

Mizoram atanga Tripura a inbengbel tawh Bru zinga Mizoram District pathuma vote la nei mi 6,232 te chu Mizoram Electoral Roll atanga an hming paih fel a ni.

District pathum a Official-te sawi danin Electoral Roll ennawn hna kal mekah August ni 2-a Draft Roll tihchhuah hma ngeiin Tripura a inbengbel tawh Bru vote neite hming paih hna hi zawhfel tura ruahman a ni a. Chu chu ngawrh taka thawkin District pathum – Mamit, Kolasib leh Lunglei-a Assembly bial pathum theuh a Bru vote la nei hmingte chu paihfel a ni tawh a. Mamit District-ah hian Bru vote nei hming la chuang 4,950 paih niin Kolasib District-ah 948 leh Lunglei District-ah hming 334 te paih a ni tawh a ni. Kolasib leh Lunglei District-a Assembly bial pathum ve ve-ah hian Tripura a cheng Bru vote nei hi an tam tawh loh avangin tunhnaia ni 15 hun pek chhungah hming paih hna hi an zo har lova, Mamit-ah erawh chuan hming a tam avangin an zo har hret ni a thudawn a ni.

Mamit District chhunga Assembly bial 3 - Hachhek, Dampa leh Mamit-a Tripura a inbengbel tawh Bru vote nei mi 4,950 la awm te chu Zirtawpni zan khan Mizoram Electoral Roll atanga paih fel an ni a. Mamit DC Office-a Election Branch chuan tun Zirtawpni zan dar 11:30 khan Tripura Bru Camp a awm, Tripura-a inbengbel tawh, Mamit District Electoral Roll a la awm vote nei mi 4,950 te chu Mizoram Electoral Roll atanga paih zawh vek tawh a ngaih an nih thu dawn a ni.

Tripura Camp-a awm te chungchangah inremna kum 2020-a lo ziah tawh angin Mizoram Electoral Roll a la awm Bru, Tripura inbengbel tawhte chu Tripura State chhungah khua leh tui nihna nei vek tawh tura ngaih an ni a, he inremna ang hian heng mi te Electoral Roll atanga paih tur hian hmalakna kalpui a ni.