Assembly Secretariat-a thawk tur lakna sut a ni

Mizoram Assembly Secretariat hnuaia thawk tur hrang hrang mi 11 lakna tura Order lo tihchhuah tawh chu Inrinni khan sut leh niin hei vang hian he Order sut phuttu Zirlai pawl ten Vawiin a Assembly House kawt-a punkhawm neih an tum pawh thulh a ni.

Tarlan tawh angin Assembly Secretariat hian tunhnai khan Assembly Secretariat a thawk turin LDC 8 bakah Assistant, UDC leh Translator pakhat theuh, an vaiin mi 11 an la thar a. Hna lak dan ah thil fel lo leh vua leh vang induhsakna a awm ni ngei nia hriain Mizo Zirlai Pawl (MZP) leh Mizo Students Union (MSU) chuan sut leh tura phutin Zirtawpni khan Aizawl-a Assembly House kawt-ah an pungkhawm a, resolution pass in, sut a nih loh chuan kawngzawh leh Total Bandh neih hial an tum thu an sawi a, hei bakah hian Vawiin hian lungawi lohna lantir hian punkhawm leh an tum bawk a ni.

Hetihlai hian Inrinni khan Mizoram Legislative Assembly Secretariat chuan thuchhuah thar siamin thuneitu sang atanga tawngka-a hriattirna an dawn angin tunhnaia Assembly Secretariat-a thawktu lak thar mi 11 - Lalramliani Sailo (Translator); Melissa Lalremruati (Assistant); Samuel Lalremruata Zote (UDC) leh LDC tur mi 8 Christina Lalhmunmawii; Vanlalruati Sailo; Lalmuankima Sailo; Lalhmangaihzuali Khawlhring; H. Rebecca VL. Ruatsangi; Nicky Lalchhuanmawia; Zothankimi leh K. Lalhruaitluanga te Appointment sut a nih thu leh hemi rual hian heng hna hrang hrang laknaa Panel List-a mi 8 dahte pawh sut a ni tih a tarlang a ni.

Hetianga an thilphut te tih hlawhtlin a nih tak avang hian Zirlai Pawl te chuan Vawiin a Assembly House kawt-a punkhawm leh an tum chu an thulh thu an sawi ve nghal bawk a ni.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man