Mizoram-a Covid hri leng ziaawm hret hretin nimin thlengin enkawllai mi 6 an awm

Mizoram-ah nimin thleng khan COVID-19 hri kai enkawllai mi 6 la awmin Integrated Disease Surveillance Programme (IDSP)-a State Nodal Officer Dr. Pachuau Lalmalsawma chuan hri leng chu a ziaawm chho hret hret niin a sawi a. “Test hum hum ang kha kan ti ta lem lo a, hetih lai hian inringhlelte erawh kan test zel,” a ti bawk.

IDSP in thuchhuah siama an tarlan danin Mizoram-ah hian Sample 19,96,672 enfiah tawh atangin CO-VID-19 hri kai mi2,39,552 hmuh an ni tawh a, an zinga 2,38,812 te chu enkawl dam ni tawhin hri kai hmuh atanga za zela 99.69 te chu enkawl dam an ni a, hri kai enkawllai mi 6 la awmin heng te hi Aizawl District-ah mi 5 leh Champhai District-ah mi pakhat te an ni a. June thla chhung khan hri kai 116 zet hmuh an ni.

Hetihlai hian Mizoram-ah COVID-19 hri kai boral mi 734 awm tawhin thla hmasa June 22 khan Aizawl Upper Republic Veng-a cheng K. Thangliankhuma (59) chu boralin ani hnuah hian Mizoram-a COVID-19 hri kai zingah boral an la awm leh lo a. COVID-19 hri kai avanga boral te hi Aizawl District-ah 467, Lunglei District-ah 53, Kolasib District-ah 43, Serchhip District-ah 37, Champhai Diustrict-ah 34, Lawngtlai District-ah 28, Mamit leh Siaha District-ah 22 ve ve, Saitual District-ah 15, Hnahthial District-ah 8 leh Khawzawl District-ah 5 te an ni. 

Mizoram-a COVID-19 hri leng buaipuitu, Integrated Disease Surveillance Programme (IDSP)-a State Nodal Officer Dr. Pachuau Lalmalsawma chuan hri leng chu a ziaawm chho hret hret niin a sawi a, “Hri kai hmuhchhuah hi an tlem chho hret hret a, tuna kan hmuhte pawh lungkhama neih tul kan ti lem lo a, a veite pawh hian an la na lutuk lem lo a ni,” a ti a. Tunhma anga umzui vak vak ang kha an ti tawh lem lo nia sawiin, “Test hum hum ang kha kan ti ta lem lo a, hetihlai hian inringhlelte erawh kan test zel a. Tuna hri kai kan hmuhchhuahte hi chu inringhlel an ni zel a. A in enkawl dan pawh kan hre tlang tawha kan hriat avangin kan umzui lutuk lo a, fimkhur thu-ah ni nga chhung inkhung se kan duh a ni,” a ti bawk.