World Environment Day-2023 pualin Mizoram hmun hrang hrangah hun hman a ni

Nimin June 5, 2023 kha World Environment Day 2023 niin Mizoram hmun hrang hrangah he ni pual hian hun hman a ni.

Aizawl-ah chuan World Environment Day 2023 pual hian Mizoram Pollution Control Board (MPCB) buatsaihin Dawrpui Multipurpose Centre-ah ‘Beat Plastic Pollution’ tih thupui hmangin hun hman a ni a, he hun hi EF&CC Department-a Conservator of Forest (CC) Lalrammawii Sailo (IFS) chuan khuallian nia hmanpuiin kumin-a thupui hi tum hnih an hmanna a nih thu leh hman nawn ngai tawh lo tura plastic bawlhhlawh tihtlem hi kan tum ber tawh tur a nih thu a sawi a. Sarang leh polythene lam vawikhat hmana kan paih nghal mai chite hi hman tawh loh tur a nih thu sawiin, sawrkar phal tawh loh thil a nih bakah kan khawvel tichhetu an ni tih hre nawn leh turin mipuite a chah a. Environment humhim nana man tlawm ber pawl thing phun uar deuh deuh a pawimawh thu a sawi bawk.

He hunah hian NIT Mizoram leh Mizoram Pollution Control Board in Waste Reduction Hackathon an buatsaih tur chu hawn nghal a ni a, MPCB hian World Environment Day hi May thlatir atang khan Mission LiFE hnuai atangin an hmang chho reng tawh a, Awareness Campaign leh Mass Cleaning Drive-te neiin District hrang hrangah hun an lo hmang tawh a ni.

World Environment Day pual hian Serchhip District-a Thenzawl khua ah pawh Victory English School ten Faina hnatlang neiin Thenzawl Thlanmualpui-a Sarang leh plastic bawlhhlawh te an chharfai a, he hunah hian he School-a Zirtirtute chuan World Environment Day awmzia leh nihphung te hrilhfiahin, khawvel sik leh sa humhalh a tul dan leh chumi kawnga zirlaite mawhphurhna hrang hrangte an sawi bawk a ni.

Ministry of Information & Broadcasting hnuaia Central Bureau of Communication (CBC) Aizawl Unit bultumin Govt. Luangmual Middle School-ah pawh World Environment Day hi hman a ni a, Kolasib leh Mamit-ah te pawh he ni pual hian inkhawm neiin Lunglei-ah pawh Faina hnatlang leh thingphun hnatlang neih a ni bawk.