Manipur atanga raltlan ten harsatna an neih loh nan theihtawpa tanpui an ni dawn

Manipur buai vanga sahimna zawnga Mizoram-a rawn lut te enkawl dan tur ngaihtuah tura sawrkarin a ruat thar ‘High-Level Committee on Internationally Displaced Persons of Manipur in Mizoram’ chu nimin khan thukhawmin kan unau Manipur atanga raltlan te hian ei leh bar leh tawmhulna ah harsatna an neih lohna turin theihtawpa tanpui zel nise an ti.

High-Level Committee on Internationally Displaced Persons of Manipur in Mizoram thutkhawm hi Directorate of Forensic Science Laboratory Conference Hall-ah an Chairman leh Home Minister Lalchamliana chuan a kaihruai a, Home Minister chuan Manipur buai vanga Mizoram a raltlan rawn lut te dinhmun tlangpui sawifiahin, Myanmar leh Bangladesh atangin tun dinhmunah raltlan 50000 chuang kan dawngsawng mek a, COVID vanga harsatna kan tawhin ziaawm lam a pan mek laiin Manipur-a kan unauten harsatna namen lo an hmachhawn leh a, kan hnuchhawn thiang lova, kan sawrkar sum dinhmun leh kan hmanraw neih te pawhin tuar deuh dawn mahse kan unaute an nih bakah COVID hripui len lai pawha Mizo tlawmngaihna nen hmangaih taka min lo tanpui a min lo thlamuantu te an nih vangin theihtawp chhuahin kan lo buaipui zel dawn a ni, a ti.

Nimin-a thutkhawm ah hian sawrkar leh pawl hrang hrangte hmalak dan tarlan niin, ‘Kan unau Manipur atanga raltlan te hian ei leh bar leh tawmhulna ah harsatna an neih lohna turin theih-tawpa tanpui zel nise’ tiin Resolution an pass a. Raltlan rawn lut te chhinchhhiahna mumal leh felfai taka siam turin data tha neih ngai tiin ICT Department in Management Information System (MIS) lo buatsaih se an ti a. Chhungkhat laina belh tur nei lote awmna tur sawrkar hmunhma hman mek bakah hmun dang ngaihtuah belh nise, he buaina hian eng chen nge a awh dawn tih hriat a nih loh vangin sawrkar hmunhma bakah hmun remchang dang te pawh lo thlithlai lawk nise an ti bawk.

Raltlan zingah sikul naupang te chu zirna In hrang hrangah document phut lova admit turin School Education Department in thuchhuah an lo siam tawh angin College zirlaite zir chhunzawm dan tur ruahman a tul thu leh raltlan te hriselna endik a uluk taka vil zui a that thu sawi a ni a. Chief Minister in heng raltlan te chhawmdawlna tur sum Prime Minister hnena a lo dil tawh chu rang taka bawhzui tur in tirh tha an tih bakah raltlante chhawm-dawlna kawngah tlawmngai pawl te, Kohhran te leh mitin te inphalzau turin an ngen bawk a ni.

Mizoram sawrkar chuan Manipur buaina avanga Mizoram-a sahimna zawnga tlanlutte lo dawngsawnga enkawl zui turin Home Minister Lalchamliana kaihhruaina hnuaiah ‘High Level Committee on Internally Displaced Persons (IDPs) of Manipur in Mizoram’ chu June 4, 2023 khan a din a, Vice Chairman-ah Minister of State Lalc-hhandama Ralte niin Member Secretary-ah Home Secretary H. Lalengmawia a ni a. Member atan Minister pathum – Lalruatkima, K. Lalrinliana leh Robert Romawia Royte te bakah a kaihhnawih sawrkar Department hotute leh Aizawl District Bawrhsap, Central YMA, Mizoram Journalists’ Association leh Mizoram Kohhran Hruaitu Committee aiawhte an awm dawn a. Manipur atanga sahimna zawnga lo lutte dawnsawn leh enkawl zui dan tur an ngaihtuah dawn bakah heng mite chhawm-dawl dan enpuia, ruahmantu an ni dawn a ni.

Home Secretary H. Lalengmawia kaih-hruaiin ‘Executive Committee on Internally Displaced Persons (IDPs) of Manipur in Mizoram’ din ni bawkin Member Secretary-ah Home Department-a OSD-cum-Joint Secretary chu ruat a ni bawk a. Member atan Police, P&E, PHE, Health & FW, FCS&CA, DM&R, School Education, Aizawl DC bakah Central YMA aiawhte an awm ang. He Committee hian Home Minister kaihhruai High Level Committee thurel bawhzui kawngah leh chhawmdawl hna thawh kawnga sawrkar Department/Agency te mawhphurhna tih hlawhtlin a nih theihna’n an enzui pui dawn a ni.