Latest News

Kum 5 tang tur leh cheng nuai 20 chawi turin hrem

MAMCO sum cheng nuai 268 tih chingpen thubuaia thiamloh chang Mustaqur Rahman chu kum 5 lungin tang tur leh cheng nuai 20 chawi tura a chungthu rel a ni a, pawisa chawi tur hi a neilo anih chuan kum 20 chhung lungin a tan belh ang.

Special Judge (Prevention of Corruption Act) Dr. HTC. Lalrinchhana chuan MAMCO sum cheng nuai 268 tichingpena puh vanga Anti Corruption Bureau (ACB)-in thubuai an siam sak chungchangah Mustaqur Rahman, Guwahati hi Zirtawpni khan thiamloh a lo chantir tawh a, nimin khan Court chuan hremna tur hi puangin kum 5 lungin tang tur leh cheng nuai 20 chawi tura a chungthu rel a ni a, pawisa chawi tur hi a neilo anih chuan kum 20 chhung lungin tan belh tura tih a ni bawk.

Tarlan tawh angin MAMCO sum cheng nuai 268 eirûkna ah ACB chuan December 3, 2015 khan thubuai ziaklutin an chhuina ah khatih laia MAMCO Deputy Manager Lalremthanga leh a Consultant Mustaqur Rahman chu inhnam-hnawih ah puh an ni a. ACB chuan Lalremthanga leh Mustaqur Rahman te chu manin Interim Bail hmangin Court-in a chhuah a. A hnuah Guwahati High Court, Aizawl Bench chuan Mustaqur Rahman bail dilna hnawlin, Court hniam zawka kal turin Order a siam a; mahse Rahman chu Court hniam zawkah inlan loin a tlanbo zui a ni.

He thubuai ah hian Lalremthanga chu Special Judge (Prevention of Corruption Act) chuan Nov. 22, 2022 khan thiamloh a chantir a, kum 5 chhung táng tur leh Rs. 5,00,000 chawi turin a hrem a. Mustaqur Rahman man phalna (Warrant of Arrest) pawh Court chuan a tichhuak nghal bawk a. ACB chuan Warrant of Arrest bawh-zuiin Mizoram-a IPS Officer lo thawkte puihna in February 24, 2023 khan an man leh a. Tunah hian Central Jail-ah a tang mek a ni.

Comments

Popular News (Last 30 Days)