Social Media kaltlanga thuthar thehdarhtu te pualin Media Workshop buatsaih a ni

Social Media kaltlanga thuthar thehdarhtute pualin nimin khan ‘Media Workshop for Youtubers & Related Media’ chu Aizawl-a I&PR Auditorium-ah neih a ni.

Information & Public Relations Department leh Information & Communication Technology Department tangkawp buatsaih he Workshop-ah hian Mizo Youtubers’ Association aiawhte leh Youtuber dangte bakah Political party hrang hranga Media Cell aiawhte leh Tlawmngai pawl hrang hranga Media lam buaipuitute an tel a. He hun hi I&PR Minister Lalruatkima chuan hmanpuiin sawrkar hmalakna in Print leh Electronic Media pual Workshop buatsaih a nih tawh thin thu leh Social Media hmanga thuthar thehdarhtute puala Media Workshop erawh a vawikhatna a nih thu a sawi a. Media pawimawhna leh Media in kan nunphung a nghawng dan te sawiin, naupang inawmtleina atan pawh Social Media. a bik takin youtube kan hmang nasa a, chutiang bawkin kum upa lam pawhin an hmang nasa tih a sawi a, “Politics leh Pathian thu bakah nitin khawsak chungchang atanga zeldin thawnthu thlengin thlir tur leh ngaihthlak tur a awm tawh avang hian kan chhungkaw nun bakah kan khawtlang nun, kan inthenawm khawvenna thlengin hlawk zawka kan chhawr dan turte Vawiin Workshop-ah hian kan zirchhuah ngei ka beisei a ni,” a ti.

Social Media chu mi tam takin eizawnna atan an hman thu pawh I&PR Minister chuan sawiin, “Mizoram-ah pawh Social Media content Creator engemawzat kan nei ve tawh a, an Social Media channel subscribe-tu tam tak an awm a, anni hian in thu leh hla te an lo ngaihchan reng thin avangin in thuchhuak ten nasa takin an rilru leh ngaihtuahna a nghawng thei a, chuvang tak chuan kan fimkhur lehzual a ngai em em a, kan tawngkam hman chungchangah pawh Mizo tawng dik kan hman rualin tawngkam hawihhawm kan hman a tul hle a. Chanchinthar thehdarh hmasatu nih a pawimawhin a chakawm thin a, chutih rual erawh chuan thubelhchian dawl leh rintlak ngaihchan phawt te hi a tul thin,” a ti a. Sawrkarin inkaihhruaina leh dan a zam te bakah Journalist te inkaihhruaina dan awm sa te chu an zawm hram hram hian an him bakah midangte tan pawh malsawmna thlentu kan ni zawk thin tih a sawi bawk a ni.

Nimin-a he hun hman hi I&PR Director C. Lalnunkima chuan kaihruaiin ‘Politics boruak tha thlen tura Social Media pawimawhna’ tih te; ‘Social Media hmangtute mawhphurhna’ tih te; ‘Social Media thatna leh chhiatna’ leh ‘Social Media kaihhnawih dan pawimawhte’ tih thupui hmanga mithiam te paper buatsaih chu zirho a ni a, sawihona hun hman a nih bakah zawhna leh chhanna hun te hman a ni bawk.