Zangnadawmna la tawh te insenghawi tir an ni

Lunglei leh Tlabung inkar National Highway-302 in a paltlang tur Tlabung khaw chhunga ram neitu zinga zangnadawmna la tawh chhungkaw 122 te chu chhuahtir an ni.

Tlabung atanga thu kan dawn danin NH. 302 in a paltlang turah hian Tlabung khawchhunga awm zangnadawmna la tawh chhungkaw 66-te chuan kawngpui atan an awmna laih chhiat a nih dawn avangin an chenna hmun an lo chhuahsan tawh a, nimahsela chhan dang engemaw vanga an chenna In luah zui zel leh thil neih thenkhat la senghawi ve lo chhungkaw 122 an la awm avangin, heng mite hi NH. 302 atan bika Competent Authority for Land Acquisition (CALA) atana ruat Lunglei Addl. DC Donny Lalruatsanga hoin a kaihhnawih department leh khawtlang hruaitu tangkawp ten niminpiah tlai khan tlawhin insenghawi tir an ni.

Zawhna chhangin Donny Lalruatsanga chuan, zangnadawmna pek fel tawh chhungkua te chu ni 60 chhunga insenghawia an chenna hmun chhuahsan tura hriattir an lo nih tawh thu sawiin, hemi hnu hian ni 45 dang pek belh an nih leh tawh thu a sawi a, heng chhungkuate hi insenghawi nan hun an pe tam tawk tawha ngaih a nih avang leh Prime Minister's Office lam atanga nawrna nasa tak a awm bawk si avangin inhriatthiam zui zel chu an tan thil theih a ni tawh lo niin a sawi.

Hetihlai hian Tlabung khawchhung bikah zangnadawmna an tel tur zat dawng pha loa in ngaih vanga sum la dawng ve duh lo chhungkaw thenkhat an la awm a, heng mite zualkona hi Court lamah a la inchiah mek avangin tun tuma an chenna chhuahsana insenghawitirte zingah hian an tel ve rih lo a ni. Lunglei leh Tlabung inkar NH. 302 hi Ministry of Road, Transport and Highway sum cheng vbc. 849 sengin kum 2021 atang khan sial tan a ni a, zangnadawmna atan hian vbc. 202.42 zet pek a ni tawh a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar