Serchhip Police ten ni 2 awh Training an nei tan

Sawrkar kum kal meka Serchhip District chhunga Police te tana 'In-Service Training' hmasa ber chu nimin khan Serchhip-ah neih tan niin Vawiin hian chhunzawma zawhfel a ni ang.
Serchhip SP Conference Hall-a he training hawnna neih hi Serchhip SDPO leh DSP (Hqrs.) Kaste Romalsawma chuan hmanpuiin a hawng a, In-Service Training hi Police Hqrs. atangin nikum lam khan Quarter tinah nei tura an rawn tih angin sawrkar kum liamta atang khan neih a nih thu leh tun tum hi tun sawrkar kum-a a hmasa ber tur a nih thu a sawi a. Training-ah hian District chhunga Police te mi 20-25 vel tel tura koh thin an nih thu leh an hnathawhna atana thil tangkai leh pawi-mawh hrang hrang nia an hriat te zir thin niin hmun dang atanga mithiam zawk te pawh an sawm thin thu a sawi bawk.


Serchhip SDPO chuan training pawi-mawh zia sawiin, an thil hriat tawh te chu a thara in hriatnawn tir fo a tul thu leh tha zawka hna an thawh theihna turin an tawnhriat atanga inzirna hun pawimawh a nih bawk thu a sawi a. Training apiangah hlawkna a awm thu sawiin, training a tel chunga hlawkna engemaw tal kan hmu lo a nih chuan mahni pawh kan in enfiah ve a tul thu a sawi bawk.

He trianing ah hian Serchhip SP Office-a Reserved Officer Inspr. H. Biakchhuma chu Course Coordinator niin ni 2 chhunga training neih chhung hian POCSO Act chungchang te, ND&PS Act chungchang te, Cyber Crime chungchanga hriat tur pawimawh leh Office hnathawhna atana thil pawimawh hrang hrangte mithiam ten an zirtir dawn a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar