Sawrkar School te Zirlaibu la dawn kim loh rang taka pe turin AAP in Mizoram sawrkar an phut

Aam Aadmi Party (AAP) Mizoram chuan tun thlenga Sawrkar School ten zirlaibu an la dawng kim lo chu hriatthiam a har an tih thu sawiin, Zirlaibu la dawng kimlote hnenah rang taka pe turin sawrkar an phut tih an sawi a. Sawrkar chu Education ngai pawimawh tak tak lova an ngaih thu an sawi bawk.

Aam Aadmi Party (AAP) Mizoram hruaitute hian State President Andrew Lalremkima hovin nimin khan Aizawl Press Club-ah thuthar thehdarhtute kawmin Sawrkar School luh tan a nih atangin thla thum hnu, July thla ah Zirna In ten First Term Exam an tan tawh dawn laia tun thlenga sawrkar School thenkhatah zirlaibu an la dawngkimlo leh khawi District mahin lehkhabu an la dawng kim lo chu mak an tih thu leh hriatthiam harsa an tih thu sawiin, Sawrkar chu Education ngaipawimawh tak tak lova an ngai tih an sawi a. May 17, 2023 khan AAP hruaitute hian Governor Hari Babu Kambhampati pawh an hmuh thu leh hu hrang hrang an sawipui thu sawiin, Mizoram zirna chungchangte pawh an thlen thu leh lehkha ngai pawimawha Larsap in hma a lakpuina ah avangin sawrkar School te lehkhabu dawn loh dan te pawh an hriat phah thu sawiin lawmthu an sawi a. Zirlaibu la dawng kim lo School hrang hrangte hnenah rang taka pe tura sawrkar an phut thu an sawi bawk a ni.

AAP hruaitute chuan tunah hian Class VII Mathematics, Science leh Hindi chu chhut a la ni lo nia sawi bawkin, School tam tak chuan an zirlai hlui te ta la letin zirtirna kalpui a nih thu an sawi a. Tun dinhmunah Free Text Book hi Khawzawl District chu dawng tha ber niin, 96.61% an dawng a, Champhai District chu a dawng chhe ber niin 76.25% an dawng niin an sawi bawk.

AAP chuan Mizoram hmun hrang hranga sawrkar School-a zirtirtu indaihlohna nasa lutuk chu rang taka chingfel tura sawrkar phutin, mahni Subject nilo zirtirna pe Zirtirtu an tam lutuk chu Sawrkarin a tih tur a tih that tawk loh vang a nih thu an sawi a. Sawrkar School-a naupang pun chhan chu Covid-19 avanga harsatna tawh vang leh raltlan an pun vanga an ngaih thu pawh sawiin, kum 2022-ah sawrkar School ah zirlai an pun laiin 2023-ah chuan an tlahniam leh tawh niin an sawi bawk.