Mizoram in kalphung thar aiin kalphung nghet a mamawh - J. Malsawmzuala

MNF Adviser J. Malsawmzuala Vanchhawng chuan Mizoram in kalphung thar aiin kalphung nghet a mamawh tih sawiin, “MNF Party chuan kan ram leh kan hnam a thatna turin dinna nghet tak a nei a, chutah chuan a tir atanga tun thlengin ala ding reng,” a ti.

MNF Party in nimin-a Mizo Hnam Run, Serchhip-a Chhung Inkhawm an neih ah MNF Adviser J, Malsawmzuala Vanchhawng chuan Mizoram in kalphung thar aiin kalphung nghet a mamawh tih sawiin, “MNF Party chuan kan ram leh kan hnam a thatna turin dinna nghet tak a nei a, chutah chuan a tir atanga tun thlengin ala ding reng,” tiin a thli beng zawng apiang leh mite lawm zawng apiang bawha chumi lam hawi apianga kan thusawite kan thlak thin anih chuan ram leh hnam tan a himlo, a ti. MNF Adviser chuan MNF sawrkar in kawng hrang hrangah nasa takin beih a tawk nia sawiin, mi thenkhat chuan North East State dangte leh ramchhung hmundangte nena khaikhinin chhe em em mai leh eirukna tam em em bik leh Sawrkar hotute eiru vek mai a chhe lailet der-a an puhna hriat tur a tam em em niin a sawi a. MNF Sawrkar chu eirukna leh hlemhletna do turin Manifesto-ah a intiam nia sawiin, “Chutiang tak chuan Chief Minister thlenga chhui theihna turin Lok Ayukta-te pawh a taka thawk thei turin MNF Sawrkar chuan a siam a ni,” a ti a. Hetihlai hian kum 2019 atang khan Mizoram Lok Ayukta hian thubuai 48 chiah ngaihtuah tur ala ziaklut a, heng thubuai zingah hian thiamloh chantir chu sawi loh, eirukna thutlinga ngaih, thubuai siamsak tura thawn tlaka ngaih pakhatmah an la nei lo niin a sawi.

MNF Adviser chuan Social Media leh Political platform-ah nasa taka inpuhmawhna a awm thin chu a vei thu sawiin, he inpuhmawhna hian Dan rorelna, Sawrkar hnathawk Law Court System zawng zawng a rinna nghat lo mihring Zoram zimte ah kan in chherchhuah zel chuan kan khawtlang nunhona, Zonun zemawi, khawtlang nun nuam em em leh lungrual taka Kohhran leh Sakhuana kaltlang a kan hmalak thinna te chu a chhe zawngin a nghawng palh theih thu leh hmasawnna aiin hnungtawlh zawngin min kaltir ang tih a hlauhawm hle tih a sawi a bawk.

Eirukna leh hlemhletna thu a MNF sawrkar puhmawhtute chu ‘Eng vangin nge Dan rorelna hnuaiah an kal mai loh?’ tih chu a zawhna a nih thu pawh J. Malsawmzuala chuan sawiin, “India Danpui hnuaiah Dan khauh tak kan nei a, Eirukna thu ah phei chuan Dan khauh tak a awm thu a sawi a. “Eirukna thu a nasa taka sawrkar puh mektute hian Dan hnuaiah a taka hma la ngam lo a, mipui rilru hruaikawi ringawt kan tum zel anih chuan, khua leh tui tha nih an tlin lo tihna a ni,” tiin an party mi kalkhawmte fuihna thu a sawi bawk a ni.