Manipur-a buaina ah hma la turin Mizoram-a Manipuri te phut

Mizo Zirlai Pawl (MZP) General Hqrs. hruaitute chuan nimin June 15, 2023 khan All Mizoram Manipuri Association (AMMA) hruaitute kawmin Manipur-a buaina thleng mek sutkian a nih theihna atan hma la turin an phut.

Aizawl a MZP Office-a MZP hruaitute leh AMMA te inkawmna ah hian MZP President Lalnunmawia Pautu chuan Mizoram-ah Manipur mi te zalen taka an awm laia Manipur-a Zohnahthlak kan unau te tawrhna chu enliam mai mai harsa an tih thu sawiin, “Thil tha zawk a thlen theih nan hma in lak loh chuan in chungah a chhe ber pawh thleng thei,” a ti a. Manipur Zofate chunga thil thleng ang chu an chungah thleng ve se an duh a nih loh chuan a rang lamin buaina a reh theih nan hma an lak a ngaih thu leh an hmalakna an enzui zel tur thu AMMA hruaitute chu a hrilh bawk a ni.

He Meeting-ah hian Manipur buaina avanga Zofate tawrhna chu sutkian a nih theih nan Meitei hruaitute’n theihtawp chhuahin hma la se; hemi chungchangah hian Union Home Minister leh Manipur Chief Minister hmuin sawipui se an ti a. Manipur-a Zofate tawrhna a reh theih nana AMMA hmalakna leh hmalak dan te chu hun remchang hmasa bera thlirho leh turin thu dah a ni bawk. Nimin-a inkawmna ah hian AMMA hruaitute hi an President Wahengbam Gopeshore hoin mi paruk an tel a ni.