National Legislators' Conference-ah Mizoram MLA te tel

India ram-a MIT-School of Government (SOG) buatsaih, National Legislators' Conference (NLC) hmasa ber chu nimin khan Mumbai-ah neih tan niin Mizoram atangin Assembly Speaker Lalrinliana Sailo leh MLA te an tel a ni.

National Legislators' Conference (NLC) vawi khatna hi Grand Hyatt Hotel Conference Hall-ah neih niin Conference thlengtu Maharashtra sawrkar aiawhin Assembly Speaker Rahul Narwekar chuan State hrang hrang atanga Conference hmang tura kalkhawmte lawmna thu a sawi a. Maharshtra state lo indin chhoh dan leh hruaitu hmasa ten India rama State changtlung leh pawimawh ber pakhat ni tura hma an lo lak dan te a tarlang bawk.

NLC hi Jio World Convention Centre, Bandra-ah ni 3 chhung neih chhunzawm a ni dawn a. India ram State hrang hrang atanga Legislator rual ten mahni ram leh ziarang inhriattawnna te, ngaihdan thawhkhawm leh sawihona hun te, Democracy than zelna tur atana pawimawh te, rorelna tha nei tura Legislator te hmalakna tur te, zirna lama hmasawnna rualkhai zawka kalpui dan turte, sum leh pai dinhmun thanna atana hmalakna tur pawimawh leh area hrang hranga hmasawnna turte an sawiho ang.

Conference-ah hian India ram state hrang hrang leh Commonwealth ram hrang hrang atangin Assembly Speaker leh Chairman te, Legislators rualte leh Official pawimawh thahnem tak sawm an ni a. Mizoram atangin Speaker Lalrinliana Sailo leh Political Party hrang hrang aiawh MLA 6 - KT. Rokhaw, Nihar Kanti Chakma, Er. H. Lalzirliana, Dr. K. Pachhunga, Dr. Vanlalthlana leh BD. Chakma te an tel a. Official aiawhin Lalhmahruaia Zote, Commissioner & Secretary leh P.B. Lianthangpuii Jt.Director, I&PR te bakah Assembly Secretariat atangin Oficer leh Staff 4 an tel bawk a ni.