Manipur atangin sahimna zawng 8498 lut tawh

Nimin tlai thleng khan Manipur buaina avanga Mizoram-a raltlan rawn lut mi 8498 an awm mek.

Tunhnaia Manipur State chhunga buaina thleng avanga sahimna zawnga Mizoram-a rawn lut hi an pung zel a, tun thlengin District 11 zinga 9-ah rawn lut awm tawhin nimin tlai thleng khan mi 8498 an rawn lut tawh a ni. District hrang hrang zingah Kolasib District-a rawn lut tam berin mi 3077 an rawn lut tawh a, Aizawl District-ah 2740 rawn lut tawhin Saitual District-ah 2282 an rawn lut tawh bawk a. Heng bakah hian Champhai District-ah 209, Lunglei District-ah 69, Serchhip District-ah 47, Khawzawl District-ah 37, Mamit District-ah 33 leh Hnahthial District-ah mi 4 an rawn lut tawh a ni.

Hetihlai hian Home Commissioner H Lalengmawia chuan Manipur raltlante chhawm-dawlna tur hian Ministry of Home Affairs-ah cheng vbc. 5 dil a nih thu sawiin, “Chief Minister Pu Zoramthanga DO letter hmangin dilna hi thlen a ni,” a ti a. Home Commissioner chuan tuna an mamawh zualpui phuhrukna turin cheng vbc. 5 dil phawt a nih thu leh an hmuh ngei pawh an beisei tih a sawi a; a bak dang chu a tul dan a zirin la bawhzui tur a nih thu a sawi a, raltlante chu sawrkarin a theih ang angin a chhawm-dawl zel a, tun dinhmunah chuan harsatna tawk an awm lo tih leh raltlan tam zawk chu Relief Camp-ah an awm mek tih a sawi bawk.

Hei bakah hian Manipur khua leh tuite Mizoram-a an tlanluh chungchangah Manipur sawrkarin Mizoram sawrkar a la bepawp lo tih Home Commissioner chuan a sawi bawk a, “Manipur sawrkar atangin an mite Mizorama awmte thawnkir tur emaw, ngaihsak tur emaw, hemi chungchangah eng thu mah dawn kan la nei lo,” a ti.

Comments

Popular News (Last 30 Days)

Vawiin-ah HSLC result

Vawiin-ah HSSLC Exam result