AR sawnchhuah chungchangah sawrkar zawhna zawt

ZPM Thalaite chuan MNF sawrkar chu Aizawl khawpui atanga Assam Rifles sawnchhuah chu politics khelhna atân chauh em ni an hman tiin an zawt.

Nimin-a thuchhuah an siamah ZPM Thalaite chuan Mizoram sawrkarin RTI zawhna a chhanna atangin Zokhawsâng-a Assam Rifles-te an insawnluhna tura Mizoram sawrkarin a tih tur ang ang a tih zawk vek tawh thu târlan a nih thu tarlangin, “LMC inthlan dawna Land Revenue & Settlement Minister Pu Lalruatkima'n Assam Rifles-te chu a Battalion pum huapa an Atta nuaina leh Kelsa kanna bêl nen lama Zokhawsâng-a insuan anga mipui hmaa a sawi hnuah, Vawiin thlenga Zokhawsâng-a an la insawn lut lo hi ZPM Thalai chuan a hrethiam lova, Aizawl khawpui atanga Assam Rifles sawnchhuah hi MNF sawrkâr hian politics khelhna atân chauh em ni a hman? tih hi kan zawhna a ni,” an ti.

ZPM Thalaite chuan Assam Rifles thuneitute hnen atanga thu an dawn danin Mizoram sawrkâr in Zokhawsâng Assam Rifles Complex-a a hnathawh chu a chhiat thu pawh an sawi a, building luah tlâk lohte a awm em tih sawifiah tura Mizoram sawrkar an phut thu an sawi a. LMC inthlan laia Assam Rifles-te Zokhawsâng-a insawn lut tawh anga MNF Minister leh Party hruaitu hraw tak takin an sawi chu mipui zahlohna lian taka an ngaih thu an tarlang bawk a ni.