Manipur atanga rawn lutte chhawmdawlna ah mamawh dil te pek loh an nei lo ang tih sawi

Union Minister of State for Minority Affairs John Barla chuan Manipur atanga Mizoram-a raltlan te chhawmdawlna chungchangah State sawrkar in an mamawh an dil chuan pek loh a nei lo ang tih a sawi.

Mizoram a zin mek Union Minister of State for Minority Affairs John Barla hian nimin khan Aizawl-a BJP Office-ah thuthar thehdarhtute kawmin thenawm Manipur State-a buaina chungchanga thuthar thehdarhtute zawhna chu fimkhur ngai tak a nih avangin sawi theih a neih loh thu a sawi a. Sawrkar chuan remna leh muanna atan theihtawpa hma a lak thu sawiin, “Tunah pawh Home Minister chuan Manipur a thutchilh a, remna leh muanna a awm theihna turin hma a la mek a ni. He thil thlengah hian fimkhur a ngai a, engkim sawi chi a ni lo,” a ti a. Manipur atanga Mizoram-a raltlante chhawmdawlna Central sawrkar-in a ngaihtuah sak dawn em tih chungchang zawhna chu John Barla chuan, “Sate sawrkarin an mamawh an dil chuan pek loh a nei lo ang. A tul ang zelin Central chuan hma a la ang,” tiin Manipur State thenawma sahimna zawnga tlanchhia te pawh an awmna State sawrkarin chhinchhiaha Central-ah report pe tura a hrilh thu leh anmahni tanpuina atan sawrkarin beng a chhit reng thu a sawi bawk

Thuthar thehdarhtute a kawmna ah hian John Birla chuan BJP sawrkar hmalakna hrang hrangte tarlangin, “Kum 10 kalta chhunga India ram hmasawnna dinhmun chu khawvela hian a hmu chiang a, a mi cheng te pawhin an hmu a ni,” tiin India mi vbc. 130 chuang te hian Narendra Modi kaihhruaina an ringtawk niin a sawi a, “He rinna hi kum 2014 atanga 2023 inkar chhung hian a sang chak hle, remna siam kawngah chak takin a kal a, mi an ngialnghet a, ram chhung hmasawnna chu mitin hmuh a ni,” a ti a, Modi-a sawrkar hnuaia hmasawnna hrang hrang point 50 chuang zet a sawi bawk. Mizoram-ah BJP sawrkar se eng angin nge hma an lak dan tur zawhna chu John Barla chuan, “Mipuite tana hmasawnna siam hi kan tum ber a ni. Tunah pawh kan ti reng. North East pumpui ah tunah pawh hian hmasawnna lam hawiin hma kan la reng a ni,” a ti bawk.

Prime Minister Narendra Modi sawrkarna hnuaiah hmeichhia ten hamthatna nasa tak an dawn thu te, tui chawi ngai tawh lovin mahni In lumah ngei tui an herh haw bakah lehkha zirna hun an neih theih tawh thu a sawi bawk a. Hmeichhe chunga hleilenna thleng thin chu a tlem tawh thu bakah hri leng pawh a tlem tawh thu te, inthiarna hmun thianghlim a awm tawh thu leh kan chhevel boruak pawhin nasa taka hma a sawn tawh thu a sawi a. India ramin zalenna a hmuh atangin a vawikhatna atan Sanitary Pads tangkaina chu Red Fort atanga puanzar a nih thu te, damdawi chi hrang hrang natna ti dam thei te chu a let 50 leh 80-a a tlawm thu a sawi bawk.