Cheng nuai 87.45 senga sak Serchhip-a Observation Home building thar hawn a ni

Serchhip Kawlri tlang-a cheng nuai 87.45 senga 'Observation Home' sak thar chu Inrinni khan Social Welfare & Tribal Affairs Department changtu Minister Er. Lalrinawma chuan a hawng.
Kum tlinglo pawikhawih leh dan kalha che te enkawlna tur hmun 'Observation Home' sak thar hawnna hunah hian SW&TA Minister Er. Lalrinawma chuan Obsevation Home building thar hawn a ni chu lawmawm a tih rualin, hmang tangkai tur awm tam lo se a duh thu a sawi a, Obsevation Home lo awmna chhan ber chhungkaw kehchhiatna leh nupa inthenna te chu lo tlem deuh deuh se a duh takzet thu sawiin, amaherawh chu hetia Observation Home a lo awm tak si ah chuan a mamawhtuten tangkai takin hmang ngei thei se a duh thu a sawi bawk.


He hunah hian Women & Child Development Department Director Zoramthangi Chhangte pawhin Social Welfare &Tribal Affairs Department hnuaia peng hrang hrangte inthendarh dan tarlangin, Serchhip-a Observation Home chungchang a sawifiah bawk a. Naupang kum 18 la tlinglo, dan kalha che mi 25 enkawl theihna tura duan a nih thu leh hetiang Observation Home hi kum 2016 khan Serchhip-ah din tan a nih thu a sawi a, Mission Vatsalya hnuaiah Women & Child Development, Social Welfare & Tribal Affairs Department in a enkawl a, Principal Magistrate kaihhruaina hnuaiah Juvenile Justice Board (JJB) ten Home a awm naupangte chungchang hi an ngaihtuah thin a, a tul dan a zirin Home dangah pawh an refer thin thu a sawi bawk. He Home-ah hian Superintendent hovin thawktu mi 10 an awm a, Home a awm naupangte chuan nunphung pangngai an zawh leh theihna turin zirtirna chi hrang hrang bakah intihlimna leh infiamna chi hrang hrang pek thin an ni a. Devotion mumal taka neihpui thin an nih bakah an hriselna dinhmun te uluka endik thin niin, an lo puitlin huna an eizawnna tur inbuatsaih nan thiam thil inzirtirna- Vocational Training te an neihpui thin an ni.

Observation Home building hawnna hun hi District Bawrhsap Nazuk Kumar IAS chuan kaihruaiin Rs. 87,45,000 senga sak Serchhip Kawlri Tlang-a Observation Home hi April, 2022 khan sak tan a ni a, kumin April thla khan zawhfel a ni a. Building pahnih sak niin Main Building hi Rs. 55,82,953 senga sak a nih bakah Superintendent Office building hi Rs. 31,62,047 senga sak a ni bawk a, Deparmental Work-a sak a ni.

SW&TA Minister hian Observation Home a hawn zawh hian Serchhip Entlang-a Eklavya Model Residential School chu a tlawh nghal a, School Chapel-ah Principal Vanlalruata leh a thawhpuite leh zirlai naupangte nen inkawmhona neiin, hma an sawnna tura an mamawh hrang hrangte a ngaihthlak sak a, Minister hian zirlai naupangte fuihna thu a sawi bawk a. Hemi hnu hian Serchhip P&E Veng-a Hmeichhia hleilenna tawk ten an pan theih 'One Stop Centre' chu a tlawh bawk.

Comments

Popular News (Last 30 Days)

Vawiin-ah HSSLC Exam result