Manipur atanga Mizoram-a raltlante tanpuina tura sawrkar laipui-a sum dil chu hmuh a la ni lo

Manipur tualchhung buaina thleng avanga sahimna zawnga Mizoram-a rawn raltlante tanpuia enkawlna tur sum Mizoram sawrkar in sawrkar laipui-a a dil chu tun thlengin hmuh a la ni lova, hemi chungchangah hian sawrkar laipui atangin chhanna dawn a la ni lo bawk.

Home Minister Lalchamliana sawi danin heng raltlan te tanpuina atan hian a tirah May thla laihawl vel khan Chief Minister Zoramthanga’n DO Letter hmangin cheng vbc. 5 sawrkar laipui-ah dilin a hnuah raltlan an rawn luh belh chhoh tak zel avangin cheng vbc. 10 a dil leh a. Tun thlengin sum dil hi pek a la nih loh bakah sawrkar laipui atangin Official-in engmah thu leh hla an la nei lo tih AIR a hrilh a. May ni 16 khan Chief Minister hian cheng vbc. 5 dilna hi Prime Minister Narendra Modi hnenah a thlen a. Manipur atanga sahimna zawnga rawn tlanlut hi a sang tela an luh chhoh reng avangin May ni 23 khan cheng vbc. 10 pe zawk turin a dil leh a ni.

May ni 3, 2023 atanga Manipur-a chi leh chi kara buaina leh tharum thawhna a thlen khan Manipur tlangram-a Zofa tam tak chuan inhumhimna zawngin Mizoram an rawn lut a. Mi sang tel tak tak Mizorama himna zawnga lo lutte hi sawrkarin an eitur buhfaite leh an awmna turte a ruahman sak bakah an lo luhna khawtlang leh tlawmngai pawl hruaitute’n an theih ang anga lo tuamhlawmin , ei leh in tur leh an awmna turte an ruahman sak bawk a. Sawrkar leh khawtlang hruaitute’n rei tak enkawl zuina tur pawisa an neih loh avangin sawrkar laipui-ah sum hi an dil ta a ni.

Hetihlai hian darkar 24 chhung khan Manipur atanga sahimna zawng mi 52 an rawn luh belh avangin nimin tlailam dar 5:00 thlenga Manipur atanga Mizoram-a rawn raltlan zat chu mi 10,543 an tling ta a. Tun dinhmunah Kolasib District chu Manipur atanga sahimna zawnga lut tamna ber niin mi 3,754 an awm a. Aizawl District-ah mi 3,750 awmin Saitual District-ah mi 2,542 an awm bawk. Manipur tlangmite’n tun ni hnih khata an belh ve tak Lawngtlai District-ah chuan Manipur atanga sahimna zawnga tlanchhia mi 10 an awm ve mek a. Heti hian Mizoram District 11-ah Manipur raltlan an awm kim vek tawh a ni.