Kolasib District Hospital sak mek a hmunah enfiah

Khum 100 awm theihna tura Kolasib District Hospital sak mek chu nimin khan bialtu MLA leh Supply Minister K. Lalrinliana chuan tlawhin Hospital in a mamawh thildang a hmalak dan turte thawktute nen an sawiho bawk.

Kolasib District Hospital hi Northeast Special Infrastructure Development Scheme atanga sak mek niin bialtu MLA chuan khum 100 awm theihna tur District Hospital sak mek a ni chu lawmawm a tih thu a sawi a, a nih dan tur ang tak a sak a nih theih nan PWD lama thawktuten uluk taka an vilpui a tul thu leh hmanrua hman leh a sak dan ah duhthusam lohna lai a awm a nih chuan ennawn leh tul anga siamtha vat thin turin thawktute a chah bawk. District Hospital Blood Bank-a thawktu indaihlohna phuhruk a nih theih nan MLA Fund hmangin thawktu pakhat ruahman nghal a nih tur thu leh Laboratory-ah Thyroid Function Test kalpui theihna tur khawl bun a nih theih nana hmalak dan turte sawi bawkin, Bawlh-hlawh halralna hmun hman chhunzawm theih a nih tak loh avanga District Hospital-in harsatna a tawh mek sutkian nan tun thla ni 14-ah sawihona nei turin a ti bawk a ni.

Food, Civil Supplies & Consumer Affairs Department changtu Minister ni bawk K. Lalrinliana hian District Civil Supplies Office bakah Supply Godown-a buhfai dinhmun enin a that leh that loh te a endik a. National Food Security Mission hnuaia chhawngkaw tin in chanvo an neih te dik tak a pekchhuah a nih theih nan thahnemngai tak a thawk zel turin thawktute a chah a. Dum Lui-a Chakai Farm pawh tlawhin thawktute chuan tun dinhmunah Farm Pond engemaw zat ah Chakai an inthlapun tawh thu leh hrisel takin an enkawl mek thu an sawi a ni.