Zofate rorelna pakhat hnuaia awm hi MNF chuan kan nghahhlelh ber a ni - Lalruatkima

MNF Adviser leh Minister Lalruatkima chuan, “Zofate rorelna pakhat hnuaia awm hi MNF chuan kan nghahhlelh ber a ni,” a ti.

Tuirial West Block MNF Conference nimin-a Awithangpa Hall, Kawnpui-a neih a hmanpuina ah MNF Advicer Lalruatkima chuan Zofaten zalenna meichher kan chhi a, thangtharte thinlungah Mizo a awm chhung chuan Mizo Nationalism hi a mit tawh dawn lo tih sawiin, “Zofa hmun hrang hranga thendarha awmte Isua Krista ringtu kan ni vekte hi a makin Pathian hnam hriat kan nih zia a chiang hle a. Tunah kan unaute Zofate Jerusalem-ah an lo haw mek a, an tawng a lo awn deuh a nih pawhin unau vek kan ni tih i hrereng ang u,” a ti.

Zofate'n Hnam anga beih kan tawh mek lai hian Zoramthanga anga Leader tha Mizo hnam hian a nei tih Lalruatkima chuan sawiin, “Ram in ri nei mahse, hnam in ri a nei lo,” a ti a. “Hmun hrang hranga awm Zofate tahna hi kan tahna a ni a, an mittui hi kan mittui a ni. An tan kan ding tlat zel dawn. Hnam tana silai lek ngam, martar tam tak awm tawhna Party, ramri humhalh tura silai hmetpuak ngam hi hnam chhan turin kan duap dui lovang,” tiin “Hun harsaa he ram kan kuta dah ngam Pathian hian hun tha leh thawl zawka he ram enkawl tur hian min ring tawk ang tih ka ring a. Policy-a buai lo, Leader-a buai ve lo Pathian leh kan ram tan titu Party hi kan sawrkar leh ngeiin ka ring a ni,” a ti bawk.