Khawzawl-ah Patient Attendants' Shelter hawng

Deputy Chief Minister Tawnluia chuan nimin khan Khawzawl Dinthar Veng-ah Patient Attendants' Shelter (PAS) a hawng.

Patient Attendants' Shelter (PAS) hi khualkhua atanga damlo leh a awmpuitu a duh apiang tana thlenna tur Khualbuk niin hetiang hmun tha tak Khawzawl a hlawhtling taka buatsaih a ni leh hman theih tura hawn fel a ni ta chu lawmawm a tih thu Deputy Chief Minister chuan sawiin, mipui leh a mamawhtu apiangte'n tangkai taka an hman theih nana duhsakna a hlan bawk a ni.

Patient Attendants' Shelter (PAS) hi UD&PA hnuaia Deendayal Antyodaya Yojana-National Urban Livelihoods Mission (DAY-NULM) Fund Rs. 53,35,090/- senga sak niin Khawzawl Sub-Hqrs. MHIP in a hmun tur ram an pek bakah building sak hna an thawk a, inremna siam angin a enkawl chhunzawm hna pawh hi an thawk dawn a, Mizo pa chhiara chhawng thum niin Rreception Counter, Councelling Room, Kitchen, Lounge, Recreation Room, Caretaker Room, Dormitory mi 10 riah theihna awmin Room tinah hian Toilet dah vek a ni a. Mutbu leh eirawngbawlna hmanrua te dah a nih bakah Solar Heating System, Solar Inverter leh thil pawimawh dangte he building-ah hian a awm bawk a ni. Shelter for Urban Homeless (SUH) inkaihhruaina dan dinglai angin a enkawl zui zel nan kum 5 chhung Operation and Maintenace Fund khum khatah kum khat atan Rs. 12,000/- zel pek thin a ni ang.