Hmarchhak-a NSS intawhkhawmna Aizawl-ah nei

India hmarchhak State-a NSS Volunteer-te intawhkhawmna hun ‘North East NSS Festival 2023’ chu nimin khan Pachhunga University College Seminar Hall-ah neih niin Sports Minister Robert Romawia Royte chuan khuallian niin a hmanpui a. India hmarchhak state-a NSS ten intawhkhawmna hun tha tak an nei thei thin chu thil hlu tak a ni tih sawiin, State hrang hrang hnam ziarang inzirtawnna leh thiantha insiam tawnna hun atana hmang turin NSS Volunteer-te chu a chah bawk.

India hmarchhak State NSS Volunteer te intawhkhawmnaah hian NSS Manipur tih loh hmarchhak State hrang hrang atangin NSS Volunteer-te an telkim thei a, Tun tum hi Mizoram in North East NSS Festival hi vawi 5 a thlenna niin June 13-17, 2023 chhung a huam dawn a, hmarchhak State hrang hrang atangin NSS volunteer mi 280 vel tel tura beisei an ni.