Khaw tinah ruihhlo dotu tur Task Force din rel

Mizoram District tina khua zawng zawngah ruihhlo dotu tur Task Force din nise tiin Working Committee on Ruihhlo Do chuan an rel.

Mizoram sawrkarin ruihhlo do kawnga hma la tura a din Working Committee on Ruihhlo Do hi Zirtawpni khan an Chairman leh Excise & Narcotics Department changtu Minister Er. Lalrinawma hovin Mizoram State Veterinary Council Conference Hall-ah an thukhawm a, he hunah hian Mizoram a ruihhlo hluar zel dona tura Mizoram sawrkarin 'Core Committee on Ruihhlo do' hnena cheng vbc. 3 a pek hman dan leh hmalakna hrang hrangte thlirin an hmachhawp te an sawiho a. Drug Demand Reduction, Supply Reduction leh Harm Reduction chungchanga Department leh NGO hrang hrang te hmalakna thlir ho a ni a, ruihhlo dona kawngah chak zawka hmalak a nih theih nan uar zawka do leh thawhhona tha neih a tul thu sawi a ni a. Khawpui mai bakah thingtlang lama ruihhlo hluar nasa lutuk chu veiawm tiin, hmun kilkhawr ber thlenga ruihhlo hluar ta chu nasa lehzual a inhrilhhriatna (awareness) kalpui nise an ti a. Action Plan zau zawk a siam tha tiin District tina khua zawng zawngah Ruihhlo do tu tur Task Force din ni se tih a rel bawk a ni.

Report a tarlan anih danin Mizoram Police chuan kumin January atanga May thla chhungin Heroin kg. 26.521 an man tawh a, kum hmasa chhunga an man zat kg. 49.367 nena khaikhinin kumin ah hian an man tam zawk a. Pseudoephedrine (Meth siamna atana hman thin) pawh kg. 210.72 zet man tawhin, nikum lam khan kg. 29.80 man a lo ni tawh bawk a. Kumin chhungin Methamphetamine kg 25.38 an man tawh bawk. Excise & Narcotics Department chuan kumin January atanga June thla thleng khan Heroin kg. 27.751 an man tawh a, Ganja kg 15.305 man tawhin Methamphatamine kg 4.056 an lo man tawh bawk a. Central YMA pawhin nikum September ni 9 atang khan Heroin hawng 1696 an lo man tawh bawk a ni.